Neto tan season a tawp

Premier League club Wolves forward Pedro Neto chu khup hliam vangin hun rei tak a chawlh a ngai dawn a, tun season chhungin a hmel kan hmu hman tawh lo ang - European Championship pawh a khelh a rinawm ta lo.

Kum 21 mi Neto hi kartawpa Wolves leh Fulham inkhelh ṭumin a hliam a, chawlhlawk hman hmain lakchhuah a ni. A hliam hi endik a nih hnuah zai a ngai dawn a, tun kar tawp lam hian an zai ang.

Wolves chuan thu-chhuah siamin, "Pedro Neto chu a khup hliam endik a nih hnuah vanduai thlak takin zai a ngai dawn a, tun season chhung chuan a inkhelh hman a beiseiawm tawh lo," tiin an player chungchang an sawi.

Wolves defender pakhat Jonny pawh khup hliam vangin zai a ngai dawn a, khel bawr hliam vanga a chawlh reng hnuah Marcal erawh a inkhel thei dawn hnai tawh. Midfielder Ruben Neves chu hri leng a kai avangin khung hran mek a ni bawk.

Premier League chuan tun kar tir khan player leh club staff mi 2,940 an endik a, an zinga pahnih chuan hri an kai - pakhat zawk chu Neves hi a ni.