A vawi khat nan India-ah AFC Champions League
Asia khawmualpuia club football inelna sang ber AFC Champions League chu zaninah khelh ṭan a ni dawn ta a, FC Goa chuan zan dar 10:30-ah Al Rayyan an mikhual dawn.
Covid-19 avangin inelna hi home & away-a khelh a ni dawn lo a, Goa awmna group E hi Indian Super League pawh zo taka thlengtu Goa chuan an thleng dawn. India-a Champions League nghah a nih hmasak ber a ni.
FC Goa-in 'home advantage' an nei bik dawn tihna a ni a, an group-a an elpui turte hi Iranian champion Persepolis, Qatar Stars League club Al-Rayyan leh UAE club ṭha Al Wahda-te an ni a, an ṭha hlawm hle.
Mahni mualah khel dawn mah se FC Goa tan a awlsam dawn lo tih a chiang a, last 16 luh ai mahin mualpho loh hram chu an rilru luahtu hmasa a ni ang.
Hman & tun
AFC Champions League hi tun hma chuan Asian Champion Club Tournament leh Asian Club Championship tia hriat a ni ṭhin a, he inelnaah hian Mysore State, West Bengal, FC Punjab Police, East Bengal, Mohun Bagan, Salgaocar, JCT leh Churchill Brothers-te an lo khel tawh.
Mahse, inelna kalphung thlaka Champions League hming a put hnuah erawh group stage khel turin Indian club an inpetkai leh tawh lo a, season hmasa khan preliminary round 1-ah I League champion Chennai City chuan 1-0 in Bahrain club Al-Riffa an ngam lo.
AFC-in a hnuaia club inelna sang ber a hlut zawk theih dan tur a ngaihtuah a, team 32 inelna ni ṭhin chu team 40-ah a tisang. India chuan hei hi vanneihpui nghalin Champions League group stage-ah hmun ruak pakhat a nei ve zui.
Team 40 hi group 10 (A-J) ah ṭhen an ni a, group A-E hi 'West Region' tih niin 'East Region' ah group F-J an awm thung. Group tina pakhatna ṭheuhin last 16 an lut ang a, region pahnih aṭanga pahnihna ti ṭha pathum ve vein knockout round hi an lut dawn bawk.
Goa tlin dan
AFC Champions League-ah hmun a tam tak avangin India pawh group stage hmun ruak pakhat pek an ni a, All India Football Federation (AIFF) lamin ISL chu India rama football league sang bera a pawm tak avangin ISL chanah a dah.
Mahse, ISL kalphung hi league ni loin tournament a ni a, final hmanga champion an zawn ṭhin avangin ISL champion hi AFC tehna danah Champions League khel turin an tling lo. Hei vang hian ISL champion ni loin league round-a point hmu sang ber chu AFC Champions League khel tura tih an ni ta a, League Winners' Shield leh cheng nuai 50 pek an ni bawk.
FC Goa hi season hmasa (2019-20) ISL-ah champion lo mah se league round-a point hmu sang ber an ni a, chuvang chuan Champions League khel tur hian an tling.
Goa bihchianna
Season hman zawh tak ISL-ah Goa hi league round-ah palina an ni a, semifinal lut mah se champion team Mumbai City an ngam loh avangin final erawh an thleng zo lo.
Champions League-ah ram pawn player pali chiah club tinin an chhawr thei a, hei vang hian Goan club hian an goal khung khawl Igor Angulo leh midfielder Alberto Noguera-te chu squad-ah an telh lo. Goa hian tlarhnung laia khel turin Australian defender James Donachie leh Spanish centre back Ivan Gonzalez chu squad-ah an telh a, midfield-ah Spanish midfielder Edu Bedia awmin striker-ah Jorge Ortiz-a awm bawk.
Coach hi kum 40 mi Juan Ferrando-a ni a, a kum la nau mah se boruak sanga a buai lohzia chu ISL-ah kan hre tawh a, a kaihhruaina hnuaia Goa inkhel tur hi en châkawm a tling - he club hian Mizo player kawl an nei lo thung.
Al-Rayyan an ṭha
Goa tan match hmasa ber aṭangin inkhel a harsa nghal dawn - an hmachhawn tur Al-Rayyan SC hi Qatar Stars League (2020-21) season-a pathumna an ni a, France leh Paris Saint-Germain boss hlui Laurent Blanc enkawlna hnuaiah an khel mek.
Tlarhmaa an chhuanvawr Yohan Boli hi Ivory Coast tana vawi sarih inlan thei a ni a, season hmasa ṭan dawna Qatari club-a zawm hma khan Belgian top division club Sint-Truiden tan season nga zet a khel hman a, Goan tlarhnung tana harsatna thlen turin a ṭha tawk.
Goa tana lawmna tur chu hliam vanga centre back Gabriel Mercado inlan thei lo tur hi a ni a, kum 34 mi defender hi Argentina tana vawi 25 inlan tawh a ni a, River Plate leh Sevilla tana khel ṭhin a ni.
Kum 29 mi midfielder Franck Kom hi Cameroon tana vawi 13 inlan tawh a ni a, kum 31 mi defender Yacine Brahimi hi Granada leh Porto tana khel tawh niin, Algeria tana vawi 56 inlan tawh a ni a, a tawi zawnga sawi chuan Goan club leh Al-Rayyan player-te khaikhin chi an ni lo.
