Joshua-te inhnek hun an sawn
British heavyweight boxer Anthony Joshua chu June 20-ah Kubrat Pulev nen inhnek tura tih ni mah se an inhnek hun tur hi sawn a ni a, a ni tur erawh tih chian a la ni lo thung.
Kum 30 mi Joshua hian world heavyweight boxing-ah IBF, WBA, WBO leh IBO title a kawl mek a, Kubrat Pulev lakah a kawnghren kawl lai humhim tur hian tih a ni.
Mahse, coronavirus hri lengin infiamna khawvel thlenga a nghawng takah chuan Joshua te pawh an him bik lo a, Tottenham Hotspur Stadium-a an inhnek tur chu sawn a ṭul phah.
Joshua promoter Matchroom Boxing chuan thuchhuah siamin boxer pahnih intawn leh hun tur hi an sawiho mek thu an sawi a, "A hmun ngaiah ngei an inhnek theih nan theihtawp kan chhuah a ni, " an ti.
Hriat tel tur chu Premier League hi June thla tawp hmain an zawh hman a beiseiawm loh - chutiang a nih chuan Spurs khelmual hi hman lawk theih a ni dawn lo tihna a ni a, Premier League thutlukna hian Joshua-te inhnekna tur hmunah nghawng a nei thei ang.
Joshua hian December khan unanimous points hmangin Andy Ruiz Jr chu June-a a ngam loh hnuin a hneh let a, Saudi Arabia-a hnehna a chan hnu hian ring chhungah a inlan leh tawh lo thung.
Kum 38 mi Pulev hi Joshua nen hian October 2017 khan inhnek tura tih an lo ni tawh a, mahse Cardiff khawpuia inhnek turin kar hnih chiah hun a awm tawh tihah Pulev hi a inhliam a, a inhnukdawk - a vawi hnih nan an tum leh a, hri leng vangin an buai ve leh thung.
British Boxing Board of Control chuan May thla tawp thleng an thuneihna hnuaia inhnek hrim hrim a awm an remti lo a, Joshua promoter Eddie Hearn chuan boxer pahnih intawn hun hi Premier League dinhmun chian loh avangin July-ah sawn a ngai mai theih thu a lo sawi tawh.
World heavyweight boxing-a kawnghren ngaihhlut dang WBC chu British boxer tho Tyson Fury chuan a kawl a, Fury hi Joshua nen hian inhnek tur anga sawi thawm a ri ring hman hle.
Mahse, contract-a an ziahsa angin February-a Fury-a'n WBC kawnghren a chhuhsak Deontay Wilder chuan Fury a cho nawn a, a vawi thum nan October hian an inhnek ang.
Joshua hian Pulev a hneh a, Fury hian a kawnghren a humhim bawk a nih chuan British boxer rothap pahnih an intawn ngei a beiseiawm a, hei hi khawvelin hmuh a chak chu a ni.