Liverpool thutluknain sawisel a hlawh
Premier League hmahruaitu Liverpool chuan non-playing staff-te sorkar scheme behchhanin chawlh lailawk a pe a, hetih chhunga an hlawh 80% hi sorkar hnuaia sumdawnna tenau chhawmdawl tura tih scheme aṭangin hlawh an la ang.
UK sorkar hnuaiah coronavirus hri leng vanga hnathawhnaa hlawh lama harsatna tawkte tana an hlawh 80% chin lak theih dan scheme a awm a, mahse ruahman ang chuan he scheme hi sumdawnna tenau zawk ten an hman tura tih a ni.
Premier League club zingah Newcastle United, Tottenham Hotspur, Bournemouth leh Norwich City-te chuan he scheme hi an lo hmang tawh a, Premier League club-te sum lakluh a tam tham avangin na taka sawisel an lo ni tawh.
Chutiang boruak karah chuan European football-a club hausa ber pawl leh league hmahruaitu ni laiin Reds-in he scheme hmang tura thutlukna an siam hi fans tam takin an hrethiam lo a, sawisel an tawk nasa hle.
Liverpool chuan thuchhuah siamin, "Hriat lawk loh hun khirh tak kan tawn mekah hian Liverpool chuan a hnuaia hnathawk ten an hna an chan loh nan theihtawp a lo chhuah tawh a ni," an ti a, an staff-ten an hna an chan loh nana scheme chu hmang an nih thu an sawi.
Reds-in sorkar scheme pakhat a zawm avang hian staff-te hian an hlawh 100% an la thei dawn tihna a ni a, sorkarin 80% a tum laiin Liverpool hian 20% a tum dawn thung a ni.
Liverpool sum dinhmun ngaihtuahin sorkar scheme hi mamawh lo tura ngaih an ni a, mahse an hman tak miau siah chuan an player hluite ngei pawhin Reds chet dan hi an sawisel.
Reds legend Jamie Carragher chuan, "Covid-19 hri a len tirh khan Jurgen Klopp chuan kan vai chungah a khawngaihna a lantir a nih kha. Senior player-ten Premier League player-te hlawh tih hniam a nih theih nan theihtawp an chhuah a, mahse chung an thil ṭha tih zawng zawng chu kan chhem bo ta. Liverpool, hei zet chu thutlukna duhawm lo tak a ni," tiin twitter lamah a ziak.
Liverpool striker hlui Stan Collymore chuan, "He scheme hi sumdawnna tenau zawkte an tlak chhiat loh nana tih a ni. Premier League club nei chin hi chu mi hausa tak vek an ni a, club hlutna aṭangin sum tam tak an lalut.
"Fan-te u, ngatinge an ni hi an ipte in zen tir loh?" tiin Reds thutlukna a dem a, club ṭantute chu an club thutlukna do tlat turin a sawm bawk.
Liverpool-a hnathawk, a hming tarlan loh chuan, "Club chuan chhungkua kan nih vek thu an sawi ṭhin a, Liverpool chhungkua ami angin ka inngai ta lo," a ti a, a thawhna club thutluknain a rilru a ti na.
Premier League-a point 25-a hmahruai fal mektu Liverpool hian February khan chhiah pek hmain pound maktaduai 42-a hlawkna an tel thu an puang a, an kum khat sum lakluh chu pound maktaduai 533 a tling - nikuma agent hlawh atan ringawta an sum sen chu pound maktaduai 43 a ni.