Footballer-ten hlawh tih hniam an duh lo!
Premier League thuneituten English top flight football-a player-te chu an hlawh 30% ti hniam turin ngen mah se England-a Professional Footballers' Association chuan he rawtna hi an pawm lo!
PFA chuan an hlawh 30% a tih hniam chuan sorkar a nghawng tur thu sawiin National Health Service tana a ṭhat loh thu an sawi a, hetihrual hian Premier League chu Covid-19 do nana an sum thawh zat pound maktaduai 20 chu bei tham an tih thu an hrilh zui.
Sorkar a nghawng dawn
Premier League ngen angin an hnuaia player-te hian 30%-a hlawh tih hniam hi pawm ta se hemi pungkhawm belhkhawm zat chu pound maktaduai 500 a tling dawn. Pound maktaduai 500 aṭanga player-te chhiah pek tur zat chu pound maktaduai 200 a ni ang.
PFA chuan thiam taka hei hi sawi langin, "Kan hlawh tih hniam hian sorkara kan chhiah pek a ti hniam ang a, chu chuan eng ang takin nge NHS hi a nghawng ang? Premier League hian he thil hi an ngaihtuah tel em tih chu kan zawhna a ni a, kan Healh Secretary pawh kan zawt tel nghal a ni," an ti a, vantlang hmaa player-te sawiseltu health secretary Matt Hancock pawh zawhna an pe tel nghal.
Nangni pawh kha!
Premier League-in an hnuaia player-te hlawh ti hniam turin an ngen ngawt a, PFA ngaihdan a ni hauh lo. England-a footballer intelkhawm pawl chuan, "Ṭanpui nana pound maktaduai 20-in pe chhuak hi a ṭha kan ti a, mahse hei aia tam zawk pe chhuak tur in ni.
"EFL lama pound maktaduai 125 pek tur pawh a ṭha a, mahse hei hi tun hun atan bak a ni lo. Nakin lo awm zel tura EFL leh non-league club-ten sum mumal zawk an hmuh theih dan tur hi ruahmanna kalpui a ngai a ni," an ti a, Premier League an dim lo hle.
Kan ui a ni lo
Premier League-a player langsar tam takin Covid-19 vanga harsatna tawkte an ṭanpui a, theihtawp an chhuah. Hetiang a nih reng laia na taka sawisel an ni reng hi an ning ve bawk niin a lang a, Liverpool captain Jordan Henderson chu player-ten an tha an thawh ve theih nana hmalatu langsar zinga mi a ni.
Tottenham Hotspur aṭanga Newcastle United-a loan-a khel mek Danny Rose chuan hemi chungchang hi sawiin, "Football pawn lam aṭanga sawiselna kan tawh hma khan hma kan la ṭan daih tawh.
"Jordan Henderson nen pawh phone hmangin kan inbia a, coronavirus dona tura tha kan thawhho theih nan a thawkrim em em a ni," a ti a, an thawhchhuah sum an hman dan tura football pawn lam mi an lo ṭawng ve reng chu a ngaih theih loh thu a sawi bawk.
Inhau su!
UK Secretary of State for Digital, Culture, Media and Sport Oliver Dowden chuan, "He hun harsa kan tawh lai hian mipuite chuan hetiang buaina hmuh hi an duh lo," tiin Premier League leh PFA inhmuh thiam lohna chu chin fel a duh thu a sawi.
Dowden chuan, "Football hian sport chuan a hnuaia hnathawk hlawh tlem zawkte, vantlang leh fan-te a ngai pawimawh a ni tih a tihlan a ṭul a ni," a ti zui - Premier League chuan PFA thuchhuah chungchangah hian he thu buatsaih thleng hian ṭawngkam an la nei duh rih lo thung.