Tu nge ropui zawk? Karim Benzema Vs Olivier Giroud

Coronavirus vanga khawvel a buai laiin Benzema a ṭawng tam hret a, Giroud aia a thiam zawk thu a sawi avangin French striker pahnih chanchinin ngaihven a hlawh thar thar hle. March thla tawp lam khan kum 32 mi Benzema chuan Giroud nen an theihna inthlauhzia khaikhin nan Formula 1 car leh Karting a hmang a, an sawi zui nasa hle.

Benzema thusawi man fiah tur chuan Formula 1 leh Karting hi hriatthiam hmasak a ngai. F1 car hi a inang lo a, pakhat siam tur pawhin dollar maktaduai 12.2 a ngai. Hei chauh hi a ni lo, F1 team langsar Ferrari, Mercedes, Red Bull leh McLaren te hian an car tih changtlung nan kum khatah dollar maktaduai 400 te an seng. Hetah hian staff member te, mechanic te, engineer te leh driver hlawh a tel.

F1 car pakhat atana an tha sen dah ṭha ila, car ngau ngau pawh dollar maktaduai 12.2 a nih tawh chuan a tih theih pawh a sang. A tlan chak laiin F1 car hian 300 km/h tein a tlan thei a, chawhrual pawhin 185 km/hr a la hawlh pha tho. Inelnaa hman ṭhin 200cc Go-Kart pawh a tlan chak pangngai a, hetah hian 2-stroke leh 4-stroke a la danglam. 2-stroke Go-Kart hian a tlan chak laiin 190 km/hr te a hawlh pha a, 4-stroke hian 120 km/hr a chakin a tlan thei bawk.

Chutihrualin 200cc Go Kart leh F1 car hi tehfung atana hman a nih chuan thil pahnih inthlau tak khaikhinna atan a hman theih ang.

Olivier Giroud aiin Karim Benzema a thiam zawk tih chu mi nawlpui ngaihdan a ni a, an khelh dan hmang pawh a danglam hret avangin an khaikhin meuh lo. Amaherawhchu, player pahnih hi French ve ve an ni a, hming langsar lo zawk Giroud-a'n World Cup nomawi a chawi tak avangin Benzema a ṭawng chhuak ni berin a lang.

Real Madrid striker Benzema chuan, "Formula 1 hi Karting nen an khaikhin ngai lo a, kei hi Formula 1. Ka rilru a ṭhat avangin ka khaikhin mai zawk a ni. Thil danglam tak a ti lo a, tih theih erawh a nei. Mipui pawhin a khelh dan hi an lawm chiah em tih ka hre lo," tiin an inthlauhzia a sawi. Benzema hi kum 2015 aṭang khan ram tan a khel leh tawh lo a, Euro 2016 final an luh ṭum leh 2018 World Cup-a an champion ṭumin a tel lo.

Chelsea striker Olivier Giroud chuan, "Kei hi Go-Kart maw? A nih chuan kei chu world champion Go-Kart ka ni," tiin tawifel takin a chhanglet a, World Cup nomawi chawi tawh a nihna chu chhuang takin a sawi.

Giroud leh Benzema nena inkawp tawh Antoine Griezmann pawh a rawn ṭawng chhuak a, Barcelona forward chuan, "In zawhna zawng zawng ka chhan chuan ka buai phah thei ang. Giroud hi ka duhsak a, player ṭha tak a ni a, World Cup nomawi kan chawi theihna kawngah a pawimawh," tiin Arsenal striker hlui a chhan.

Kum 32 mi Benzema leh kum 33 mi Giroud te hian football-ah sulhnu ṭha tak an hnutchhiah ve ve a. Benzema hian Lyon tana a khelh laiin Ligue 1 nomawi vawi li a chawi a, Real Madrid a zawm hnuah La Liga nomawi vawi hnih bakah Champions League nomawi vawi li a chawi tawh. Chutihrualin Benzema hi Los Blancos player langsar ber a ni ngai lo a, Cristiano Ronaldo-a'n a hliahkhuh hneh hle.

Giroud hian Ligue 1-ah Montpellier a champion pui tawh a, hemi hnu hian Arsenal leh Chelsea tan khelin league nomawi a chawi lo. Chutihrualin Giroud awm lo se France-in World Cup nomawi an chawi ang em tih chu ngaihtuah tham fe a tling. Chelsea striker hian Kylian Mbappe leh Antoine Griezmann te a thlawp ṭha a, a tawnhriat leh tharum hmangin World Cup hnuhnung berah khan a khelpuite tan hmun awl a siamsak nasa hle.

Chelsea rinrawl ṭhin Eden Hazard chuan, "Olivier hi target man a ni a, khawvela ṭha berah ka ngai. Ball a chan chuan a chelh thei a, a zarah hmun pawimawh lai kan thleng phak ṭhin. A bula ka khel thei hi ka lawm hle," tiin sawi. Chutihrualin Sergio Aguero, Harry Kane, Robert Lewandowski leh Benzema pawh tiamin Giroud aia thlan châkawm vek a n ia, amaherawhchu French striker hi team tana khel ṭhin a nih avangin dah hniam a thiang lo.

Statistics thlir phei chuan Giroud hi Benzema aiin a ṭha zawk. Chelsea striker hian hian ram tana match 97 a khelhah goal 39 a khung a, match tinah 0.4 goal khung ang a ni a. Benzema hian ram tan match 81-ah goal 27 a khung a, match tinah 0.33 goal khung ang a ni a, Formula 1 car tlukpuiah inchhal mah se Go-Kart tlukpuia a dah Giroud a pha lo!