Engvangin France-in Benzema an koh tawh loh

Kum 2015 kumtir khan Lyon leh France midfielder Mathieu Valbuena sex tape chu a mobile phone aṭangin a darh chhuak a, video chu footballer hausa bikte buaipui ṭhintu Axel Angot hnen a thleng. Angot leh a thawhpui pahnihte chuan Valbuena hnen aṭangin sex tape hmang ṭangkaiin pawisa tam tham tak chhuhsak an tum a ni.

Amaherawhchu hetih hun laia Lyon tan khel midfielder hian pawisa pek aiin police a pan a, French police-te hian mi pathumte chet dan hriat theih nan phone call zawng zawng an record sak. Angot leh a hote hian Valbuena hnen aṭanga pawisa la turin tum dang an nei a, a ṭhianpa Benzema hman ṭangkai an tum. Real Madrid forward hmang ṭangkai turin Benzema ṭhian hlui Karim Zenati an ruai a, Valbuena biak pawh dan an ngaihtuah.

October 5, 2015 khan Clairefontaine-ah France-in training an nei a, Benzema leh Valbuena chu sex tape chungchangah an inbe ṭan a. Police lamin a hnu zela Valbuena leh Benzema inbiakna bakah Benzema leh Karim Zenati inbiakna te chu an lo chhinchhiah vek avangin Real Madrid forward hi a buai phah ta. Germany leh France ten friendly an khelh ṭum khan player pahnih hi buaina vang hian squad-ah koh an ni tawh lo.

French Federation president Noel Le Graet chuan, "Valbuena hi a tuartu a ni a, buaina siamtu a ni lo. Benzema hi player fel tak ni mah se a seilenna hmun a dik bik lo a, a ṭhiante a la thlah loh avangin a vanduai phah ta a ni. Valbuena dik lohna ber chu a dah lohna tura mobile phone a dah kha a ni. Buaina a awm tak avangin Benzema hi kan hrem a ṭul a, Federation thutlukna a ni a, tun ang boruakah hi chuan koh theih a ni lo," tiin a sawi.

Benzema hi ram tan koh a ni leh tawh lo a, hemi hnu hian Les Bleus hian Euro 2016 final lutin World Cup 2018-ah an champion a, Real Madrid striker awm loh hnuah an result a ṭha zawk.