PSG-in champion lai Bayern an pet tla

UEFA Champions League-ah champion lai Bayern Munich chu nikum final-a an hneh Paris St-Germain lakah away goal rule hmanga chak loin Europe club inelna sang ber aṭangin an tla.

Thawhlehni zan quarterfinal second leg-ah Bavarians hian Eric Maxim Choupo-Moting hmangin Paris-ah mualneitu 1-0 in hneh mah se Allianz Arena-ah 3-2 in an chak loh avangin aggregate-ah 3-3 a ni. Khualmuala goal khung tam zawk PSG-in hnehna an chang.

Mauricio Pochettino kaihhruai PSG hian semifinal-ah nizana Manchester City leh Borussia Dortmund inkhela chak zawk an hmachhawn ang.

Bayern an kim lo
Hansi Flick-a'n second leg-ah goal khung khawl Robert Lewandowski hliam vangin a la chhawr thei lo a, Covid-19 positive Serge Gnabry a la tel thei lo.

Harsatna belhchhah turin Leon Goretzka leh Niklas Sule te hliam vangin an inlan thei lo a, Flick-a'n an khelh dan hmang a siksawi a ṭul phah. Goalkeeper-ah Manuel Neuer awmin defence-ah Alphonso Davies, Lucas Hernandez, Jerome Boateng leh Benjamin Pavard te an awm.

Season tawp ruala chhuak tur David Alaba chu midfield-ah Joshua Kimmich nen an inkawp a, tlarhma pali te erawh first leg-a inlan te bawk Kingsley Coman, Thomas Muller, Leroy Sane leh Eric Maxim Choupo-Moting te an ni.

Neymar leh Mbappe
PSG tan player manto pahnih Neymar leh Kylian Mbappe te an dam ṭha a, an ṭhat dun em avangin player dang awm lo an hliah khuh. A nihna takah chuan French champion hi an kim bik lo a, Italian midfielder Marco Verratti chu Covid-19 a vei hnuah dam leh tawh mah se Poch-a'n a la chhawr ngam lo..

Player ṭangkai dang Marquinhos, Mauro Icardi, Layvin Kurzawa leh Juan Bernat te inhliam vangin an la tel thei lo bawk. Chutihrualin French champion hi German champion ang em emin player inhliamin a nghawng na lo.

Rinkai PSG
PSG hi tun hma zawng kha chuan team ṭha satliah an ni a, boruak sang chinah an tla leh ṭhin. Season liam taa Thomas Tuchel-a hoa final an luh hnuah champion rinkai zingah an tel tawh a, an rilru put hmang pawh a dang tawh.

Parc des Princes-ah inkhel hmuhnawm phochhuah a ni a, Poch-a'n Neymar thiamna leh Mbappe tlan chakna hman ṭangkai a tum tih a hmuh theih nghal. Brazilian forward Neymar-a'n box chhunga ball per nang hmasa berin goal-ah pet mah se keeper Neuer-a'n a dang hman.

Mbappe ball pass ṭha changtu Neymar-a'n keeper Neuer chauh a hmachhawn chungin a ti goal lo. Brazilian forward hi box chhungah Lucas Hernandez-a'n ti tlu mah se referee-in penalty ni turah a ngai lo.

PSG number 10 Neymar a hmuhnawm chhunzawm zel a, goal ban vawi hnih a pet per bakah crossbar a pet per bawk. Goal ban per pakhat hi keeper Neuer-a dan ṭhat vang a ni a, woodwork fuh dang pahnih erawh Neymar-a vanduai vangah a ngaih theih.

Goal venhim mamawh PSG-in goal khung an tum tho a, second half-a Di Maria pass Neymar tlawh hman loh pawh a goal teuh takzet. Minute 10 ṭha khelh tur a la awm tihin Mbappe-a'n chiang takin a pet goal a, offside vangin pawm a ni lo. French champion hi Ligue 1 lamah talbuai deuh mah se Bayern laka an khelh dan thlirin Champions League-ah champion rinkai an ni pha.

Lewy tel lohna
Bayern Munich tan Eric Maxim Choupo-Moting khel chhe lo mah se Lewandowski hmunruak zau tak a hnawh khat thei lo. Polish striker hi awm se chuan result a dan theih a rinawm a, Lewy awm tak loah chuan Bayern hi khel chhe lo mah se PSG-in chak an phu zawk.

Bavarians-in first leg-ah 64% ball possession an nei a, goal shot pawh 31 zet neiin PSG-in vawi ruk chauh an nei. Second leg-ah German club hian 56% ball an chang a, shot vawi 14 chauh neiin PSG-in shot vawi 10 an nei thung.

Manchester City aṭanga manto taka an lakluh Leroy Sane tlarhmaah a hriam tawk lo a, Joshua Kimmich pawhin ṭum danga a goal khungnaah goal zawnah a pet lo.

Second leg-a goal awmchhun hi minute 40-naah a lut a, David Alaba ball pet chu Keylor Navas-a'n dangin a per chu Choupo-Moting-a'n a tauh lut. Bavarians hian goal dang khung belh theihna tur hun ṭha la nei mah se PSG tlarhnung an su tlang thei lo.

Fak phu Poch
PSG-in tun dinhmuna Europe team ṭha bera ngaih theih Bayern Munich an hneh theih nana mi pawimawh chu manager Mauricio Pochettino a ni. Tottenham Hotspur-in an duh loh Argentine manager hian Champions League nomawi em la chawi lo mah se semifinal lut tura Bayern an hneh hi a ropui hrim hrim.

French club hian European champion nih tumin manager hrang hrang an lalut tawh a, nomawi la chawi ngai lo Poch-a chunga rinna an nghat ta daih hi a mak ang reng a, chutihrualin Neymar leh Mbappe te awmna team hian European champion nih hi a hlat lo niin a ngaih theih bawk.

Pochettino chuan, "Inkhel harsa tak a ni a, player-ten fak an phu a ni. Ka player-te, club-te leh president te kan hlawhtlinna avangin ka lawmpui takzet. Team angin kan khel a, kan team-ah hian theihna a awm," tiin hnehna an chan avanga a lawm thu a sawi.

Flick hmabak a chiang lo?
Hansi Flick-a'n season liam ta khan nomawi chawi theih zawng zawng a chawi a, manager ṭha tak a ni tih chu an record chauh ni loin a team-te khelh dan aṭangin a lang thei. Amaherawhchu Flick hi Bayern manager a ni zel ang em tih chu zawhna awm thei tak a ni.

Bavarians manager Flick chuan, "Ṭum dangah chuan ka team-te hian tlarhmaah a tawp khar turin theihna sang tak an nei ṭhin. Tun ṭumah erawh a hmawr kan bawk thei lo a, kan result kan pawm thiam a ṭul. First leg-a goal thumna kan chhuah leh kha a pawi ta a, kha goal kha chu tel lo se, semifinal lut zawk tur kan ni. Chutihrualin kan khingpuite ṭhatzia kan hmu vek. An goal nawr na tak avangin ka fak a, semifinal an thlen avangin Paris ka lawmpui," tiin a sawi.

Bayern an kim lo a, tlarhmaah player chhawr tur an nei ṭha tawk lo. German football writer Raphael Honigstein chuan, "Bench aṭanga lut tur an nei lo. Minute 60-70 chhoah khan inkhel thlak danglam thei tur bench-ah an awm lo. Covid-19 vangin transfer laiin an an duh ang player an la thei lo a, Lewy leh Gnabry an chhawr theih loh chiah khan an buai ta a ni," tiin a sawi.

PSG an hneh loh vang lam ni loin German club chhungah boruak ṭha lo a awm. Manager Flick leh sporting director Hasan Salihamidzic inkarah khi a awm. Bavarians player hlui Salihamidzic hnuaia player an lak Bouna Sarr, Marc Roca leh Douglas Costa ten an khel meuh lo, chutihrualin an player lak palina Choupo-Moting erawh Lewy awm loh takah chuan a ṭangkai viau.

Flick hian Liverpool-a kal Thiago Alcantara chhuak kha pawi a ti a, season tawpa chhuak tur Alaba leh Boateng te chelh a duh niin an sawi. German manager hian Bavarians enkawlna kawngah amah aia thu an awm hi hriatthiam har a ti a, club chhung boruak ṭha lo hi a chhuah theihna chhan chu a ni.

Tun dinhmunah chuan boruak ṭha lo hi result ṭha lo hian a tih chhiat belh rin a ni a, European Championship zawhah Joachim Low-a'n Germany a enkawl dawn tawh loh avangin Flick-a chhuak tur anga sawi awm hi thuthang satliah a ni lo.

Bayern-a Flick-a thlak tur hian RB Leipzig manager Julian Nagelsmann chu sawi rik a awm a, Liverpool manager Jurgen Klopp-a hming pawh a rik tel avangin German club chhehvel a ngaihnawm zel ang.