Arsenal tan goal khung 'ngei ngei' a ngai
Arsene Wenger hun hnuhnung lamah khan 'Next Season' tih chu Arsenal chhaih fiam nana hman ṭhin a ni. Wenger a chhuak a, beiseina sang tak nena manager thar an neihte erawhin an duh ang result chu an neihpui thei rih chuang lo.
Arsenal tan Europa League hi season thara European football an khelh theihna kawng awm chhun tluk a ni tawh, semifinal lut tur chuan zaninah goal an khung ngei ngei a ngai dawn - dar 12:30 hian Slavia Prague nen an inkhel ang.
Goal a ngai
Emirates Stadium a an inkhelh ṭum khan substitute Nicolas Pepe hmangin minute 86-naah goal an khung a, mahse hun tawp hma chiaha goal an chhuah leh avangin an inhnehtawk. Zaninah goal a lut lo a nih chuan khualmuala goal nei Prague an tlang ang.
Mikel Arteta nauten goal khung an tum dawn a, goal an mamawh vanglai tak hian an captain Pierre-Emerick Aubameyang hi a dinhmun a chiang lo mek. Gabon international hian dam lohna vangin an match hnuhnung ber kha a khel lo.
Auba awm loh karah Alexandre Lacazette leh Gabriel Martinelli an inkawprem viau, anni pahnih hian Sheffield United tlarhnung pal darhin 3-0 in hnehna an chang thei - mahse an hneh hi Premier League mawngphah team an ni tih hriat tel a ngai.
Lacazette leh Martinelli te tlarhmaah inkawp se, anmahni thlawp turin Bukayo Saka a awm thei bawk a, an hnungah Martin Odegaard a lo kir leh thei tawh a nih chuan goal chu an khung ngei a rinawm. Chutih rualin Norway international hi kerek hliam dam hlim chauh a la ni.
Prague an ṭha
Arsenal khingpui tur Slavia Prague hi Czech First League hmahruaitu an ni a, table chung ber luahtu an ni satliah lo - league match 26 aṭangin goal 72 an khung a, anmahni lamah goal 15 chauh a lut. An tlarhma a hriam bakah a hnunglam a phui ṭha tih a chiang.
England defender hlui, Arsenal tan pawha khel tawh Martin Keown chuan, "Gunners khan hun ṭha an khawhral hnem lutuk, goal khat chauh an khung kha a pawi thei mai thei," tiin first leg zawh khan a lo sawi tawh, ani hi khualmuala goal khung harsat zia hrechiangtu a ni.
Gunners tana thu hriat nuam lo tur chu Jindrich Tripisovsky-a'n a naute a kaihhruai dan hi a ni. Prague hian tun hnaia inelna hrang hrang an match hmachhawn hnuhnung 23 zetah tlawm an nei lo, inringtawk takin English team hi Eden Arena-ah an lo mikhual ang.
Prague hian league goal khung hnem viau mah se player mala khung tam an nei lo. Goal 12 neitu Jan Kuchta leh Abdallah Sima te an langsar a, player dang pawh khung thei vek an ni - David Luiz leh Kieran Tierney tel loa khel tur Gunners tlarhnung tan inven uluk a ngai dawn.
Ajax an tla?
Player ṭha chher chhuak ṭhin, khelh dan phung nghet nei an nih avangin Ajax hi engtik lai mahin dah hniam ngawt theih an ni ngai lo. Mahse, first leg-ah an hun ṭha an khawhral hnem avangin AS Roma lakah 2-1 in an chak lo, tlang tur chuan goal hnih tal an khung a ngai dawn.
Ajax coach Erik ten Hag chuan, "2-1 in kan hnufual mek, mahse kan intawn hmasaka kan khelh ang khan kan ti leh thei a nih chuan kan tlang theih ka ring," a ti a, an chak lohna chu an vanduai vang niah a ngai a, zaninah chak tumin an inlan dawn.
Serie A lama beisei phak lo Roma erawh tlang turin a inringtawk hle. Roma coach Paulo Fonseca chuan, "Amsterdam khawpuia hnehna va chan kha a ropui hle, kha khan semifinal lut turin theihna kan nei tih a lantir. Mahse inkhel a la zo lo tih hriat a ngai," a ti.
Zanin hian inkhel dangah Dinamo Zagreb chuan Villarreal an lenchilh dawn. Spanish club hian khualmualah si khat faiin hnehna an lo chang tawh a, tlang tur chuan mahni goal venhim a tawk ang.
