Indian Open kaltlangpui dawn

Badminton Asso-ciation of India (BAI) chuan hri leng hluar thar leh mah se Indian Open an kaltlangpui dawn. Tokyo Olympic qualifier zinga pakhat hi May 11-16 chhung hian KD Jadhav Indoor Hall, Delhi-ah khelh a ni ang.

Indian Open-ah hian ram hrang hrang 33 aṭangin player 228 kal khawm tura ngaih an ni. Covid-19 rawn chhuahna China aṭang pawhin player an rawn kal dawn - Spanish star Carolina Marin pawh a inlan dawn a ni.

Mipa singles lamah world number 1 Kento Momota chu champion tura rinkai a ni dawn. Olympic khelh tum Kidambi Srikanth tan pawh mahni ram ngeia ranking siamṭhat theihna remchang a ni thei ang.

BAI secretary Ajay Singhania chuan, "Thil engkim fimkhur taka kalpui a ni dawn, a bik takin hri leng hluarna hmun aṭanga lo kalte chu tournament an khelh hmain ni sarih chhung khung hran hmasak an ni ang. Player leh coaching staff zawng zawng uluk taka endik an ni dawn," tiin a sawi.