Last 16-ah Tsitsipas a lut

Monte Carlo Masters khelh laiah Stefanos Tsitsipas chuan Aslan Karatsev hnehin last 16 a inhlangkai, Greek tlangval hian a khingpui lakah harsa lutuk loin 6-3, 6-4 in hnehna a chang thei a ni.

World number 5 Tsitsipas hi round hmasa berah a bye a, second round aṭangin a inlan ṭan. Russian tlangval Karatsev hneh tur hian darkar khat leh minute 24 bak a mamawh lo, a khingpui hi na taka nawr buaiin unforced errors vawi 32 ngawt a neihtir.

Kum 22 mi Tsitsipas hian a match lehpekah chuan John Millman leh Cristian Garin te inkhela chak zawk a hmachhawn leh ang. Thawhlehni zan inkhel dangah Jannik Sinner chuan Albert Ramos-Vinolas chu 6-3, 6-4 in a hneh.

Nizan khan rawlthar Sinner hian world number 1 leh seeded pakhatna ni bawk Novak Djokovic a hmachhawn leh a, result kan hre hman lo. Monte Carlo-ah hian Sinner chhiar telin Italian player pangain second round an inhlangkai.

Inkhel dangah champion lai Fabio Fognini tan pawh harsatna a awm lo. Italian star hian Miomir Kecmanovic lakah 6-2, 7-5 in hnehna a chang. Fognini chuan, "Kum 14 mi chauh ka nih lai aṭang khan he hmunah hian ka inkhel tawh," tiin a chawr chhuahna hmuna inelna hmachhawn nuam a tih thu a sawi.

Clay court inelnaah hian world number 2 Daniil Medvedev chu hri leng kai vangin a inhnukdawk. Russian tlangval a inlan loh vang hian Rafael Nadal chu seeded pahnihna pek a ni a, final hma chuan Nadal leh Djokovic an inhma-chhawn thei dawn lo.