United tan Europa a pawimawh

Manchester United-in Ole Gunnar Solskjaer-a kaihhruaina hnuaiah nomawi an la chawi lo a, tun season-a nomawi an beiseina theihna awmchhun chu Europa League chauh a ni tawh.

English club hian zanin dar 12:30 hian Europa League quarterfinal-ah Granada an mikhual dawn a, khualmualah 2-0 a an hneh tawh avangin semifinal lut turin an dinhmun a ṭha hle.

Chutihrualin hrem vangin Luke Shaw, Harry Maguire leh Scott McTominay te an khel thei dawn lo a, Norwegian manager Solskjaer-a tan player pawimawhte hahdamtirna hun ṭha a ni thei bawk ang.

Captain Maguire a awm dawn loh avangin Ole-a'n captain armband hreng tur a ruat a ngai dawn a, Bruno Fernandes chu a khan ber turah a ngaih theih. Chutihrualin Victor Lindelof kawppui turah Eric Bailly emaw Axel Tuanzebe emaw inkarah duh thlan tur a awm thei ang.

Luke Shaw thlakna turin Alex Telles a awm nghal thei a, Tominay bikah erawh lungaihna tur a awm lo. United-in midfield laia khel thei player an ngah avangin Scottish midfielder awm lo hian nghawng lian tham a nei lo ang.

Manchester United hian khualmuala Marcus Rashford leh Bruno Fernandes te khung bak Old Trafford-ah an khung thei a nih chuan player naupang zawk tan inlanna hun ṭha a nei thei ang.

Granada hmachhawn tur hian academy naupang Amad Diallo, Shola Shoretire leh Anthony Elanga te an awm a rinawm a, inkhelhna hun an nei a nih chuan kum 20 hnuai lam player-te hi entute min fukna a ni ang.

Ole Gunnar Solskjaer-a hote hian an match hnuhnung berah Tottenham Hotspur 3-1 in an hneh a, an khelh dan thlirin team boruak a ṭha. Edinson Cavani-a'n a theihna tak a pholang a, bench aṭanga lut Mason Greenwood-a'n goal a khung bakah Cavani khung tur a siamsak avangin England lama football expert-te chuan ram tana khel tlak a nih thu an sawi leh tawh a ni.