Chelsea tan hun duhawm a inher chhuak

Season duhawm lo tak kha Chelsea tan season duhawmah a inher chho mek. Thomas Tuchel an neih hnuah Chelsea fan-ten nuih loh lai an nei ta meuh lo - Champions League semifinal hial an lut ta.

Thawhlehni zan khan Champions League quarterfinal second leg-ah Chelsea-in FC Porto an hmachhawn a, 1-0 in tlawm mah se first leg-a 2-0 a an lo chak tawhna chuan chhanhimin an tlang - inkhel pahnih belhkhawmah 2-1 in an chak. Porto tan Iranian forward Mehdi Taremi chuan hun pek belhah overhead kick hmangin mawi zetin a khung a, mahse, Portuguese champion tan result thlak danglam turin hun a awm tawh lo.

Nizan khan Liverpool leh Real Madrid-ten quarterfinal second leg an khel ve bawk a, result kan hre hman lo - inkhel pahniha chak zawk hi semifinal-a Chelsea hmachhawn tur an ni.

Inkhel chu
Covid-19 inkaihhruaina dan avangin team pahnihin Sevilla khelmualah quarterfinal an khel a, Thawhlehni zan inkhel pawh hi Seville khawpuia inkhel ni mah se Chelsea tan 'home' a ni.

Inkhel hmasa zawkah Chelsea-in 2-0 a hnehna an lo chan tawh avangin pawng paw nawr a ṭul lo tih an hria a, mak takin Porto-in nawr aia fimkhur an rawn thlan ve avangin inkhel hmuhnawm tak tia sawi tur a ni lo. First half-ah Porto-in Chelsea keeper Edouard Mendy ball petchhuah ṭhat tawk loh zarah goal khung theihna remchang an nei a, mahse Jesus Corona chuan Senegalese keeper hi a hrem thei lo - Mendy leh Chelsea an vannei.

Chawlhlawk hman a nih hnuah Blues tan Christian Pulisic leh Mason Mount-ten chance an nei a, mahse, London club tan player ṭhangduang pahnih hian an khung thei bik lo.

Goal mawi bik
Champions League last 16 aṭanga Juventus 'meuh' pet chhuak theitu Porto-in hun tawp hnaih lamah goal hnih khung an mamawh tih an hre thar a, mahse, an harhchhuah hi a tlai hret tawh.

Hun pek belh minute thumnaah Taremi-a'n goal a khung ta nge nge a, right back Nanu ball cross chu Iranian forward hian boruaka mawi taka invawrh chungin goal chung kil sirah a 'bin' lut - mawi tak a ni. Kum 28 mi Taremi hi season hmasa khan Portuguese top flight club Rio Ave-ah a khel a, European football-a a season hmasa berah hian match 37-a goal 21-a khungsak hnuin tun season-ah Porto a pan.

Porto-ah pawh Taremi hian season duhawm tak a hman chhunzawm a, first leg-ah khan inlan thei ta se result-a danglam hial mai thei - tun season inelna hrang hrangah match 40 khela goal 17 khungin assist vawi 13-a nei thei.

Chelsea an ṭha
Porto-in tlak chhuanlam an zawng duh a nih chuan first leg-a Taremi leh tun season-a an club tana goal khung hnem ber Sergio Oliveira (19 goals) an chhawr theih loh kha chhuanlam tling a ni.

Chutihrual chuan Tuchel-a 'Chelsea' hi Champions League final lut turin an ṭha tawk tih erawh phat chi a ni lo. German coach Tuchel hian an mamawh a hrechiang a, Porto laka an khelh danah pawh a fimkhur hle. Blues hian goal khung belh lam aiin a chhuah loh chu thupui zawkah an nei a, an hlawhtling - Taremi goal kha chu eng team tan pawh dan chi a ni lo a, goal mawi bik huanga mi a ni a, dem tur an awm lo. Taremi fak mai a tawk.

Tuchel-a'n hliam damkawr N'Golo Kante a la chhawr loh tur thu sawi mah se midfielder Mateo Kovacic inhliam vangin Kante hi loh theih loha chhawr a ngai a, Chelsea-in champion an tum chuan Kante an mamawh tih a lang nawn - a khel ṭha takzet.

Team naupang
Chelsea tan Porto laka bul ṭan zingah Thiago Silva (kum 36), César Azpilicueta (31) leh Kanté (30)-te chu kum 30 kai tawh an ni a, an la naupang tlang hle.

Mendy (29), Jorginho (29), Antonio Rüdiger (28), Reece James (21), Ben Chilwell (24), Pulisic (22), Mount (22) leh Kai Havertz (21) te hi kum 30 la tling lo vek an ni! Mahse, he team naupang tak hian Champions League last 16 aṭangin tawnhriat nei ṭha zawk Atletico Madrid an pet chhuak a, Juventus ngamtu Porto an ngam leh ta - champion an sawi ri ngam tawh hial ang.

Tuchel-a'n Chelsea enkawl hna a thawh ṭan khan Premier League-ah pakuana an ni a, tunah chuan top four an beisei leh tawh a, FA Cup leh Champions League semifinal an lut ta bawk.

Theihtawp chhuaha ka team-ten theihtawp chhuaha an bei leh quarterfinal an tlang lai en kha a hmuhnawm takzet a, inkhel hautak hmachhawn a ngai tih kha chu kan pawm sa a ni. Television lamah chuan inkhel hmuhnawm tak a ni lo mai thei a, mahse, mual sir aṭang kha chuan game hmuhnawm leh rang tak a ni thung. Goal kan veng ṭha a, goal chhuah loh kan phu hial a ni. Chance kan nei ṭha zawk a, chance tam tak erawh a ni lo. Game pumpui thlirin chak kan phu a, minute 180 hautak tak a ni. - Thomas Tuchel, Chelsea coach

Kan khel ṭha zawk ve ve a, mahse, a tawp khar turin kan ṭha tawk lo ṭhin. Champions League kan hmachhawn danah ka lawm a, chutihrual chuan kan tlawm miau avangin kan lawmna erawh a famkim lo a ni. - Sergio Conceicao, Porto coach