Chanmari Zothan Futsal an champion nawn

RFL Plastics MFA Futsal League Season 2 final chu Zirtawpni zan khan Electric Veng Indoor Stadium-ah khelh a ni a, Chanmari Zothan Futsal chuan champion nawn turin Chhinga Veng Futsal Club chu 6-4 in an hneh.

Nikuma Futsal League hmasa ber final-ah khan Chanmari hian Chhinga Veng hi 6-5 in an hneh tawh bawk a, inelna vawi hnih awm tawhah anla champion ve ve.

Final-ah hian Chhinga Vengin Lalsawmzela hmangin goal an khung hmasa a, ani hian hattrick siamin best player-ah hial thlan ni mah se nomawi a hlawh chhuak zo lo. Chhinga Veng hian C. Lalmuanpuia awm lo an tuar a, squad nei chhah Chanmari lakah an ṭang tluan thei lo.

Champion lai tan hian tawnhriat nei ṭha Rochhingpuia leh Lalnunmawia ten goal hnih an khung a, Samuel Laltlanthanga leh Johny Lalremruata ten goal khat ve ve an khung bawk.

Chanmari coach Samuel Lalrinzuala Sailo chuan, "Season hnih chhung kan champion thei hi Pathian vang chauh a ni a. Kan thawhrimna leh thawhho ṭhat vang liau liau a ni a Player-te hian champion hi an phu ngawih ngawihin ka hria. Club hruaitu leh vengchhung mipuite vanga tun dinhmun ding thei hi kan ni a, an chungah lawmthu ka sawi mawlh mawlh e," tiin Vanglaini a hrilh.