Sterling hattrick; City umtu Liverpool
Raheem Sterling chuan Manchester City tan hattrick a siam a, Inrinni zan khan an mikhual Watford lakah a team hi 3-1 in hnehna a chanpui.
Manchester City-in hnehna an chan leh tak avangin Premier League table chung berah an awm chhunzawm zel a, nizana 4-2 a Burnley hnehtu Liverpool aia an sanna chu point khat a nih chhunzawm zel.
Liverpool tan Roberto Firmino leh Sadio Mane ten goal hnih ve ve an khung a, Burnley hian Ashley Westwood leh Jóhann Berg Gudmundsson hmangin goal khung ve mah se Anfield boruakah beiseina tak tak an insiam hmain an thamral zel.
Thla hmasa lawka champion thei dinhmuna ding Tottenham Hotspur chu 1-2 in Southampton lakah an tlawm a, champion ai chuan season tharah Champions League an khel ang em, tih chu zawhna a ni ta.
A hming Sterling
City-in first half chhungin goal an khung lo a, minute 46-na a nih chiah aṭangin inkhel erawh Sterling 'ta' a ni ta thung - second half ṭan rual deuhthawin goal hmahruai a rawn khung nghal.
Sterling-a goal khung hi Sergio Aguero siamsak a ni a, Argentine forward-in ball a pek lai hian Sterling hi a offside - linesman pawhin a phar ngei a, mahse referee Paul Tierney chuan a assistant ngaihdan hi ṭawmpui duh loin goal hi a pawm. Minute li hnua Sterling goal khung danah erawh sawisel tur a awm lo. Riyad Mahrez siamsak chu awlsam takin goal-ah a chantir a, a hattrick siamna leh tun season-a a goal 18-na chu defender pahnih a bum hnuah a khung leh bawk.
Watford tan Gerard Deulofeu chuan goal khat thawh ve mah se goal a khung meuh chuan Sterling-a'n hattrick a siam fel der tawh a, English forward ngam loin an tlawm.
Pep a fimkhur
City manager Pep Guardiola chuan, "Kan match khelh tur zawng zawng hi a pawimawh vek tawh. Thla thum ngawt chu table chung bera awm tur hian kan nghak a, hetihrual hian point kan hloh tawh dawn lo tihna a ni lo, " tiin a ṭawng fimkhur hle.
Sterling goal hmasa berin chungchangah Spanish manager chuan, "Hei tak hi VAR kan mamawh chhan chu a ni. Goal kha a offside a nih chuan a pawi ka ti a, mahse chak kan phu a ni," a ti - season thar aṭang chuan Premier League-ah VAR hman a ni tawh dawn.
Hei le Liverpool
City chak thu hre sa chungin Liverpool an inlan a, Reds hian an elpui City aiin pressure an nei sang zawk tihna a ni - minute rukna lekah goal an chhuah a, Ashley Westwood-a corner pet chu tawk fuhtu awm loin a goal.
Mahse, mahni mualah Liverpool tlawm an tum lo - Roberto Firmino chuan minute 19-na lekah si phurh sutna goal a rawn khung nghal a, hun tam pawh a liam hmain Sadio Mane chuan mawi zetin a rawn chhunzawm ve leh bawk.
Goal hmaah Mohamed Salah a vanduai chhunzawm zel a, Salah vanduaina chhawrtu erawh Firmino a ni - Egyptian forward hian goalkeeper chauh a hmachhawn chungin Charlie Taylor chuan a tibuai hman a, mahse a per lehlam chu Firmino hian changin goal-ah a chantir.
Burnley-in hun pek belha Jóhann Berg Gudmundsson goal khung hmangin beiseina thar rawn nei ve leh hman mah se Reds tan Mane chuan goal a rawn khung ve lehnghal a, 4-2 in Liverpool an chak.
Spurs an mualpho
Tottenham-in Southampton khel-mualah minute 26-na leka Harry Kane goal hmangin hma hruai mah se Saints hian hun tawp hnaih lamah Yan Valery leh James Ward-Prowse hmanga chhangletin 2-1 in an lehthal.
Spurs-in league-a an match hnuhnung pali-ah hnehna an chang zo ta lo - Saints hma hian Burnley leh Chelsea lakah a zawnin an tlawm a, Arsenal inhnehtawkpui zuiin Southampton lakah an chak lo leh ta.