Pro Fight Final a hmuhnawm Thawhlehni zanah Title Fight

Yodha 4x4 Pickup LPS Pro Fight chu Zirtawpni zan khan R. Dengṭhuama Indoor Stadium, Mualpuiah final khelh zawh a ni. March 12, Thawhlehni zan hian 'Title Fight' neih a ni dawn a, kawnghren inchuh turte hian tukin chhung hian Hawla Indoor Stadium, Republic Vengthlangah inbuk tur a ni.

Lightfly
F. Zoramchhana'n a khingpui Lallawmawma chu unanimous decision (49-46, 49-46, 49-46) in a hneh a, Pro Fight hnuhnung zawk Title Fight-a a hneh loh NT Lalbiakkima nen kawnghren an inchuh leh dawn.

Zirtawpni zan final inkhelah Cherhlun boxer Zoramchhana'n rang taka hnek zawnin fei takin a khel tluan a, judge pathum ten chak zawka an ngai vek hi a mak lo. Inelna kal mekah champion lai tel lovin GIG Motors Best Boxer a ni a; Rs 5,000 leh trophy dawngin Cherhlun chhuanvawr tan mi mala hlawhtlinna chhinchhiahtlak tak a tling.

Bantam
Laldingliana'n a vawi khat nana Pro Fight champion nih a tumna kawngah a che fuh chhunzawm zel a, 2015 champion HC Lalramfela lakah unanimous decision (49-46, 49-46, 48-47) in a chak.

Tuipui boxer Dingliana hi 2014 khan kum 15 mi niin a vawi khat nan Pro Fight-ah a tel a, lightfly-ah final lutin a chak zo lo. Bantam-a a khelh hnuah rahbi thar a tuk a, Title Fight-ah Ramfela'n vawi hnih a hneh loh zawn tawh Dinthar boxer Zonuntluanga a hmachhawn dawn.

Light
Vanlalawmpuia inhnek a hmuhnawm leh a, Khuangthing tlangval hian GIG Motors Fighter of the Night atana thlan tur khawpin a khel chhuak leh. Inhnek inhnehtawk takah a khingpui Khatla South boxer Zomuansanga chu split decision (48-47, 48-47, 47-48) in a hneh a ni.

Sete Academy aṭanga boxing zir Awmpuia hi a zirpui Muantea lakah thiamfal ni lo mah se a thawkrim a, a hnek natna leh tawrhchhelna vangin a tawpah a dingchang. Khuangthing boxer hian a match hnuhnung zawkah Republic Veng boxer Zochhuanawma Fanai a hneh tawh bawk avangin a zawnin Aizawl tlangval pahnih a hneh.

Lightheavy
Palian inhnek a nih tawh chuan mipui ngaihven a ni a, tualchhung boxer ṭha chungchuang HC Johnkenty Vanhlimpuia hmachhawn tur zawnna a nih bawk avangin lightheavy hi a boruak a lian zual.

DK Munga'n Title Fight thleng turin hun a mamawh rei lo, Hrianghmun chhuanvawr Munga hian Chaltlang Lily Veng tlangval Jack Lalsangliana chu round hnihna an khelh lai, minute khat leh second 43 lekah a knockout!

Kum 30 mi Munga hian 2014 Pro Fight a khelh aṭanga a khingpui zawng zawng la hneh vek Johnkenty a hmachhawn tur hi mipui hmuh châk a ni dawn. Tuipui boxer Johnkenty hi weight hrang pahniha champion thei awmchhun a ni.