I League champion Chennai City

East Bengal-in R. Laldanmawia goal hmangin Gokulam Kerala hneh mah se, Kolkata club a champion pui zo lo. Inrinni zan inkhel dangah Chennai City-in I League champion lai Minerva Punjab hnehin champion thar an ni.

A ngaihnawm
Kum 99-a upa East Bengal hian India ram champion ni fo tawh mah se kum 2007-a ṭan I League-ah nomawi an la chawi lo.

Kolkata club hian tun season I League tawp niah Gokulam Kerala an hneh theih a, Chennai City-in Minerva Punjab an hneh loh chuan champion thei dinhmunah an ding.

2 States
Red and Gold-in Kozhikode, Kerala-ah Gokulam an hmachhawn a, Chennai City-in Coimbatore, Tamil Nadu-ah Minerva Punjab an mikhual. Champion tur a la chian loh avangin State pahniha inkhel chu ngaihven tawn a ṭul.

Minerva Punjab-in minute thumna lekah Roland Bilala hmangin goal an khung a, Chennai City laka Punjab club hmahruai avanga lawm ber chu East Bengal daih an ni.

Champion phu ber Chennai
Chennai City-in season tluanin an khel ṭha a, an Spanish player-te an rintlak bawk. East Bengal-in goal an khung hmain South Indian club-in Pedro Manzi penalty hmangin minute 59-naah an siphurh an sut.

Gaurav Bora chuan minute 69-naah Chennai City tana a goal hmasa ber a khung a, 2-1 a nih tak avangin Kolkata club beisei a bo. Hei chauh hi ni loin, Gokulam-in forward Marcus Joseph hmangin East Bengal lakah hma an hruai thung. Chennai City tan Bora-a'n injury time-ah goal a khung belh a, goal hnih khungtu hi Assamese zinga I League champion hmasa ber a ni.

Thuphachawi nan Danmawia
East Bengal tan champion hi an kuta awm a nih tawh loh avangin tih theih a tlem a, chutihrualin Gokulam an hneh zo lo a nih chuan anmahni ṭantuten ngaihdam an harsat ang.

Kolkata club tan Mizo pali Lalrindika Ralte, Lalramchullova, Danmawia leh Brandon VL Remdika ten bul an ṭan vek a, captain Didika'n goal ban a pet per chu an chance neih ṭhat zinga mi a ni. Amaherawhchu referee duhsakna dawngin East Bengal-in penalty an hmu a, Jaime Santos-a'n minute 79-naah a khung.

Minute 85-naah Danmawia rawn lang a,Sialhawk tlangval hian a tih hram hram rah sengin goal hmaa a vanduai niah chakna goal a khung. Mizo tlangval thawhrim rah hi East Bengal ṭantuten an hmuh hmaih lo a, social media lamah chuan an club chhuahsan lo turin an ngen nasa hle.

Mittui leh indeusawhna
Coimbatore-a kalchilh Goal.com ziaktu Soham chuan, "Boruak nuam tak a ni a, a ropui danglam hle. Club neitu Rohit Ramesh mittui a tla a, chu chuan engkim a sawifiah," tiin Vanglaini a hrilh.

Chennai City coach Akbar Nawas chuan, "Player-te thawhrah a ni a, an huaisen zia an pholang a. An thawk ho ṭha a, pressure nasa tak an paltlang a ni," tiin a fak.

East Bengal elpui Mohun Bagan ṭantute erawh an lawm hle. Kolkata journalist pakhat chuan, "Champion ang maiin an lawm a, an hlim em em a ni. Season tharah hian I League hi a awm zel dawn em tih a hriat loh a, an elpui hi champion ve lo se an duh," tiin an deusawh thu Vanglaini a hrilh. Red and Gold-in I League nomawi an chawi loh laiin Mohun Bagan erawh vawi khat an champion hman a ni.

March 8, Zirtawpni
Shillong Lajong 2 - 3 Mohun Bagan
SLFC : Phrangki Buam 45+1' (P), 53'
MB : Aser Pierrick Dipanda Dicka 4' (P); Sony Norde 78'; Britto PM 88'

March 9, Inrinni
Neroca 2 - 3 Real Kashmir
NER : Subhash Singh 18'; Felix Chidi Odili 90+5'
REA : Danish Farooq Bhat 29', 49'; Bazie Armand 57'

Aizawl FC 2 - 1 Churchill Brothers
AFC : Hussein El Dor 43' (OG); Ansumana Kromah 87' (P)
CB : Willis Plaza 5'

Gokulam Kerala 1 - 2 East Bengal
GOK : Marcus Joseph 69'
EB : Jaime Santos 79' (P); R. Laldanmawia 85'

Chennai City 3 - 1 Minerva Punjab
CCFC : Pendro Manzi 56' (P); Gaurav Bora 69', 90+3'
MIN : Roland Bilala 3'