Standly hnuaiah Aizawl FC pasarihna

Aizawl FC-in tun season an I League match hnuhnung berah Churchill Brothers chu 2-1 in an lehthal a, hnehna an chang.

Inrinni khan RG Stadium-ah Mizo club hian Goan club an hmachhawn a, mikhual team hian Willis Plaza hmangin hma hruai mah se, Hussein El Dor own goal leh Ansumana Kromah penalty hmangin Aizawl FC-in hnehna an chang.

Aizawl FC manager Standly Rozario-a'n Mizo club a enkawl ṭantirh khan 10-naah an awm a, an hnuaiah Shillong Lajong chiah an awm. Standly hnuaiah Mizo club-in harhtharna an chang a, match hnuhnung berah hian player pawimawh paruk khel thei lo chungin Churchill hi an hneh thei a ni.

Mizo club coach Standly chuan, "Pasarihna hi chu ka beisei pha lo a, amaherawhchu Aizawl FC inkhel ka en ṭhin a, a theihna ka hriat avangin pariatna erawh ka nih phak ka beisei thung," tiin Vanglaini a hrilh a, a player-te thawhrimna chu a fak tel bawk.