Liverpool season-a tawp ta!

Champions League aṭangin Liverpool petchhuah an ni a, Jurgen Klopp hnuaia nomawi nena sawi kawp rem tak Reds hian tun season-ah nomawi an chawi dawn lo tihna a ni.

Nilaini zan Champions League quarterfinal second leg-ah Liverpool-in Real Madrid an mikhual a, 0-0 in an inhnehtawk - first leg-a 3-1 a chak Real Madrid an tlang a, Liverpool season a tawp ta, ti ang hiala sawi theih a ni. Tun hnai season hnih chhunga nomawi pali, Champions League, UEFA Super Cup, FIFA Club World Cup leh Premier League nomawi chawitu Reds hian kut ruakin season an mangṭha dawn.

FA Cup leh League Cup aṭangin an tla tawh a, Champions League aṭangin an tla tawh bawk - Premier League-a an beisei theih san ber chu top four a ni a, hei pawh hi a chiang lo!

Madrid mangchhia
Quarterfinal-ah Liverpool leh Real an intawn dawn khan English club-in rin an hlawh zawk - Real hi team ṭha tak la ni mah se an innghahnate an upa ve tawh a, Cristiano Ronaldo awm laia 'Real' ang kha an ni lo.

Hei mai a ni lo - Liverpool an hmachhawn hmain Real captain Sergio Ramos leh Raphael Varane inlan theih loh tur thu a chiang a, hliam vangin Liverpool talbuai ve tho mah se team ṭha zawkah ngaih an ni. Mahse, football hi lehkhaah ni loin khelmualah khelh a ni miau a, Madrid khawpuiah fak lai tur reng reng awm lo khawpa chhiain Reds an inkhel a, goal thum ngawt an va chhuah.

Liverpool beiseina siam turin Mohamed Salah-a'n goal khat a khung ve hram a, he goal khat hre ran hian Anfield-ah Reds-in Madrid an mikhual - inkhelh hma hian Hillsborough chhiatnaa nunna chan mi 96-te hriatrengna hun hman a ni a, kumin hi he chhiatna thlen cham kum 32-na a ni.

A thlawn mai maw
Anfield-ah Liverpool an khel ṭha takzet a, inkhel ham rik a rik rualin Madrid an nawr a, Real-in an nawr let tur an dang chat hneh em em bawk - an vanneih ṭum ni se minute hmasa 15 chhunga goal khung thei tur an ni.

Mahse, Liverpool vanneih zan a ni lo - Salah-a'n ṭum danga a khungna ṭhinah chance duhawm a hlah nual a, Georginio Wijnaldum, Roberto Firmino, James Milner leh Sadio Mane-te vanneih zan a ni bik chuang lo. Real tan goalkeeper Thibaut Courtois a khel ṭha hrim hrim bawk a, Belgian keeper hi Spanish champion tan si ban nghaktu ni lo se inkhel result-a danglam thei hial ang.

Mikhual team hian chance nei lo tawp erawh an ni bik lo a, striker chhuanvawr Karim Benzema chuan goal post a tih per bakah Reds keeper Alisson chuan Vinicius hun ṭha neih chu huaisen taka hmachhawnin a dansak.

Finishing mawlh hi
Jurgen Klopp-a'n first half hma taka goal an khung chuan phurna an nei thei dawn tih hriain a naute goal khung tir a tum ruh viau a, nawr pawh an nawr.

Mahse, tun season-a an talbuai ṭhinnaah tho Liverpool hi an talbuai a, an finishing a tawih tawk lo a, goal khung an thiam lo - season hmasa lawka European tlarhma hmuhnawm ber pawl kha an thamral mek.

Reds hian tun season inelna hrang hranga goal 28 khung tawh Salah an nei ngei a, mahse, vanneih reng theih a ni bik lo - Salah vanneih loh zana team chakpui thei an mamawh a, tlarhmaa Salah kawppui Mane (12 goals) leh Firmino (6) ten goal an khung tam tawk lo.

Diogo Jota hian tun season-ah hliam vangin match 25 chiah a la khel a, goal 12-a khung thung - Madrid lakah erawh bench-ah dah a ni a, luhtir a nih hnuah pawh danglamna erawh a thlen thei bik chuang lo.

Siamtharna
Tun hnai season hnih chhunga Liverpool hlawhtlinna en chuan tun season an hman dan hi manganna tham a tling a, Klopp-a tan team dinthar a hun ta em ni, tih chu zawhna awm thei a ni.

Chutihrual chuan Reds hian captain Jordan Henderson, Virgil van Dijk leh Joe Gomez-te chu hliam vangin an chhawr thei lo a, an season hi hliamin a chimbuai avangin thlir thiam a harsa hle. Champions League final 2018-a Liverpool-in Real an ngam loh ṭuma player pasarihin Nilaini zanah bul an la ṭan a, Klopp hian a player neihsa a ring rei ta mah mah em ni aw, tih theih a ni.

Klopp-a vanduai ve bawk. Nipui transfer-a a lakluh Jota-a'n a man phu khawpin khel ṭhin mah se hliam vangin a talbuai a, khawvela midfielder ṭha ber pawl Thiago Alcantara an lakluh vangin boruak nei sang viau mah se Thiago 'magic' hmuh tur kan la nei lo - he midfielder hian Real an hmachhawn match hnihah bul a ṭan lo ve ve a, hei hian Anfield-a a kum hmasa ber a hrilhfiah.

I fak ang u
Real-in Anfield-ah khel ṭha lo mah se Madrid-a an khelh ṭhat zar zoin Champions League semifinal an lut a, English club Chelsea chu an hmachhawn tur a ni.

Zinedine Zidane hi sawisel ni ṭhin mah se hun pawimawhah tak hnehna a chan leh ṭhin avangin sawisel theih a ni bik lo.La Liga-ah champion thei dinhmunah an ding mek a, Champions League-ah a thiam pali zingah an tel leh ta bawk - Ramos leh Varane tel loin he team hian Liverpool leh Barcelona a zawnin an hneh thei tlat!

Chelsea tan Paris Saint-Germain leh Manchester City hmachhawn loa semifinal-a Real Madrid hmachhawn hi lawmna tur zawk ni mah se Spanish champion hi an en sang lo ringawt a nih chuan an chesual ang. Real hian April 18 zanah league match khel turin Getafe an lenchilh zui dawn a, Liverpool-in April 19 zanah Premier League match khel turin Leeds United an lenchilh dawn thung.

Zaninah khan kan tlawm lo a, Madrid-ah zawk khan kan tlawm tawh a ni. Kan khel ṭhain kan huaisen a, chance pawh kan ngah - Madrid khan nuam tiin an khel lo hrim hrim. Mahse, goal kan khung lo a, Real Madrid-in an tawnhriat ṭha tak hmang remchang zuiin kan beiseina an tibo a ni. Tun season chu kan finishing a fuh thei meuh lo a ni ber. Kan chance nih kha en ila, maimitchhing chung pawhin Salah-a'n a khung thei tih kan hria - mahse, zaninah erawh a ni tlat lo. Kan khel ṭha a, mahse, kan tla tawh. Champions League hi nuam kan ti a, he inelnaah hian kan tel ve leh ngei a ngai dawn a ni. Tunah chuan Premier League-ah rilru kan pe leh thei tawh dawn a, kan pe leh ngei bawk ang. Theihtawp kan chhuah a ngai dawn a ni. - Jurgen Klopp, Liverpool manager

Inkhelh a harsa dawn tih chu kan hre sa a, mahse, a tawpah chuan kan duh ber kan hmu ta tho - chu chu semifinal luh a ni. Game kan thunun ṭha a, thil harsa tak kan paltlang avangin kan khelh danah kan inchhuang tur a ni.
Liverpool khan bul an ṭan ṭha dawn tih chu kan hre sa a, inkhel ṭantir minute 15 chhung phei kha chu an khel ṭha takzet zet. Mahse, hei zawng thil thleng ve tur reng a ni. Champions League quarterfinal khel kan nih avangin nghet taka din kan mamawh a, chutiang tak chuan kan ti a, semifinal kan lut a ni. - Zinedine Zidane, Real Madrid boss