Lingard-a'n duh thlan tur a ngah

Jesse Lingard-a'n loan hmanga West Ham a zawm hnuah Premier League match kua khelin goal riat a khung tawh a, English midfielder ngaihventu club an tam hle.

Manchester United manager Ole Gunnar Solskjaer chuan, "Jesse hi a chhuah hnuah a khel ṭha em em. Kan hmakhua ringawt chu ngaihtuah ila, chhuah kan phal lo ang. Amaherawhchu Jesse hi pa ṭha tak a ni a, khelhna hmun a chan mumal loh chhung zawng pawh khan a lungawi lohna a ti lang lo a, buaina a siam lo.

"Khelhna chan tumin theihtawp a chhuah a, hemi avang hian inkhelh a phu a, West Ham-ah kan kaltir ta a ni. Kan club-a rawn let turin kan duh a, tuna a chet ṭhat avang hian Euro C'ship-ah a tel theih ngei ka beisei," tiin Lingard laklet an duh thu a sawi a, a khelh duhna bera Bruno Fernandes an neih thu a sawi lang bawk.

Kum 28 mi Lingard hian bench luahlum turin Manchester United-ah let a duh a rinawm lo a, West Ham-in chelh an duh chiang bawk. Chutihrualin Lingard hian Champions League khel pha club-a khelh a duh ang.