Clay-ah Nadal leh Djokovic chak awlsam

Rafael Nadal leh Novak Djokovic te chuan clay court season an hmang ṭan ta a, an match hmasa berah harsatna tawk loin hnehna an chang. Monte Carlo Masters khelh laiah player ṭha pahnih hi an chak tluang zel a nih pawhin final hma chuan an intawng thei dawn lo.

Nilaini zan inkhelah Nadal hian Federico Delbonis lakah 6-1, 6-2 in hnehna a chang a, nizan khan Grigor Dimitrov hmachhawn lehin result kan hre hman lo. Seeded 14-na Dimitrov-a'n Jeremy Chardy chu 7-6, 6-4 in a lo hneh ve bawk a ni.

Grand Slam vawi 20 champion tawh Nadal-a'n Monte Carlo Masters title hi vawi 11 ngawt a chawi tawh a, kuminah pawh rinkai a ni - inelna lian French Open atana inbuatsaihna a ni nghal bawk.

Inelna neih hma hian world number 2 Daniil Medvedev chu coronavirus a kai vangin a inhnukdawk a, seeded pahnihna a inlan theih loh vang hian Nadal chu pahnihna pek a ni, tournament khelh hmain Russian player leh Nadal hi an training dun.

Nadal chuan, "Daniil nen khan kan practise dun a, hri a kai ta mai kha pawi ka ti hle. Training dun mah ila kan inhnaih lem lo, chuvangin hri leng chungchangah chuan ka hlauthawng lem lo. Mahse inkhel thei loa a awm erawh ka tuarpui," a ti.

Inkhel dangah Djokovic chuan Italian rawlthar Jannik Sinner 6-4, 6-2 in a hneh. World number 1 hian Australian Open nomawi a chawi hnua a match hmasa ber a khel a, hun rei tak hnua match nei leh chauh ni mah se harsatna a tawk lem lo.

Kum 33 mi Djokovic hian kuminah match 10 khel tawhin chak loh a la nei lo. A match lehpekah chuan Daniel Evans nen an inkhel ang, Britain tlangval hian Hubert Hurkacz chu 6-4, 6-1 in a lo hneh ve thung a ni.

Monte Carlo vawi hnih champion tawh Djokovic chuan, "Jannik hi tun hnaiah a khel ṭha, inelna hnuhnung Miami Open-ah khan final a thleng hial, ka tan chuan match hmasa bera ani hmachhawn hi chona hautak a tling," tiin a sawi.

Player langsar dang, champion lai Fabio Fognini leh rawlthar beiseiawm Stefanos Tsitsipas te chuan an khingpui ve ve hnehin third round an lo inhlangkai tawh a, Italy rama inelna neihah hian player ṭha an inlan hnem avangin nomawi chawi a harsa dawn.