Intlansiak turin Marquez a inpeih

Tun kar tawpa Portuguese Grand Prix an tlan hunah Marc Marquez a inlan thei tawh dawn a, Spanish rider lo kir tur hi Repsol Honda tan thu lawmawm ber a ni ngei ang, bike intlansiak ngaitu tan pawh chanchin lawmawm a ni ngei ang.

MotoGP vawi ruk champion tawh Marquez hi season hmasa khan inelna hmasa berah a chesual a, a ban ruh zai a ngai. Lo kir leh mai tura ngaih ni mah se zai nawn a ngai a, season tluana a inlan theih loh bakah kuminah pawh inelna hmasa pahnihah a la inlan thei lo.

Kum 28 mi Marquez dinhmun hi tun hnai khan doctor ten an endik a, intlansiak hmachhawn tura a inpeih tawh thu an puang. A elpui tur rider dang tan chuan ṭan lehzual a ngai dawn tih a chiang. Repsol Honda chuan thuchhuah siamin, "Tunah chuan Marquez hi a intlansiak thei leh tawh dawn," an ti. Marquez awm loh laiin Honda hian result ṭha an nei hleithei lo, an rider ṭha ber lo kir tur hi an phur nasa dawn.

Marquez chuan, "A nihna takah chuan Qatar-ah khan inelna hmachhawn ka duh tawh, mahse min enkawltu doctor ten indim tura min tih bakah inlan loh kha a ṭha zawk tiin thurawn min pe, an thu ka zawm ta zawk a ni. "Portugal-ah hian tun hmain tawnhriat ka nei tawh, amaherawhchu hripui len hma leh tun hi chu boruak a danglam tawh hle. Tunah chuan engkim hi a bul aṭanga ka ṭan ṭhat leh vek a ngai dawn," tiin zawimuanga hmasawn a tum tur thu a sawi.

Marquez awm loh karah rider mala cheṭha fal sawi tur an awm meuh lo, hnehna an in chan chhawk a ni deuh ber. A hliam dam hnuah Spanish tlangval hi eng tiang takin nge a rawn kir dawn tih chu hmuh a châkawm hle.