Azarenka a inhnukdawk

Victoria Azarenka chu kar leh chhunga khelh tur Stuttgart Open aṭangin a inhnukdawk, clay court inelna a hmachhawn loh chhan hi Covid-19 invenna damdawi (vaccine) a lak dawn vang niin a sawi.

World number 15 Azarenka chuan, "Tournament hi vaccine ka lak hun tur nen a inrual tlat mai a, hei vang hian inelna ka hmachhawn thei lo ang. Inelna buatsaihtu leh player inlan tur zawng zawngte duhsakna ka hlan," a ti.

ATP leh WTA chuan player zingah vaccine la duh an awm a nih chuan an remti a, chutihrualin vaccine lak famkim hma, lak laklawh lai chuan player leh midang bula khawsa tam lo turin an ti thung.