Thunder ngamtu Warriors

Nimin zing NBA regular season inkhelah Golden State Warriors chuan an khingpui Oklahoma City Thunder 147-109 in an hneh a, season tawpa a thiam pariat inelna playoff khel turin beiseina an la nei chhunzawm zel.

Golden State tan hian Stephen Curry chuan point 42 zet a nei, a point neih zinga 25 ngawt hi quarter thumna bika a neih a ni, hun pawimawh laiah player ṭha bik a nihna a lantir leh tak avangin a team a chakpui.

Guard Curry bakah hian Draymond Green-a langsar, Green hian 12 points, 16 assists leh 10 rebound lain triple-double a nei; season kal laiah triple-double vawi li a neihna chiah a ni a, basketball inelna sang berah vawi 28 a neihna chiah a ni bawk.