Goa-in Al-Rayyan an chelh ding

Indian Super League club FC Goa chuan Nilaini zan khan AFC Champions League match khelin Al-Rayyan an hmachhawn a, 0-0 in an inhnehtawk.

Team pahnih squad leh tawnhriat khaikhin chi a ni lo a, Paris Saint-Germain boss hlui Laurent Blanc kaihhruaina hnuaia khel Al-Rayyan-in chak tura ringtu an ngah zawk. Mahse, Indian club zinga Champions League khel hmasa ber FC Goa-in Indian football ti mualphotu nih an tum lo a, Qatari club ṭha hi Goa-ah goal khung loin an chelh ding thei.

FC Goa hian April 17 zanah Champions League-a an match hnihna an khel leh dawn a, United Arab Emirates club ṭha Al Wahda nen an inkhel ang.

Team inthlau
Football ngaina inti zingah Laurent Blanc hming hre lo an awm kher lo ang - kum 55 mi coach hian player-a nih laiin Barcelona, Inter Milan leh Manchester United tan pawh a lo khel tawh a, France tana vawi 97 inlana goal 16 khung thei a ni.

French defender ṭhin hian inkhelh a chawlhsan hnuah kum 2007 khan an ram club Bordeaux enkawl hna a thawk ṭan a, a hnuah France leh PSG-a enkawl bawk - an ram club pahnih a enkawl laiin tualchhung football-a nomawi chawi theih chu a chawi kim.

Goa coach Juan Ferrando erawh Moldova leh Greece-ah top flight league coach a lo ni ve tawh tih loh chu top flight football-a chhuan tur nei tam lo tak a ni a, kum 40 mi chauh a la ni bawk.

Buk lung khata khai chuan coach pahnih ringawt pawh an inthlau lutuk a, Indian Super League club tan point hlawhchhuah ringawt pawh chu inchhuanna tur a tling.

Ruahmanna ṭha
Goa coach Juan Ferrando-a'n an khingpui team a hrechiang a, attthlak taka nawr tum aiin 4-1-4-1 formation hman a thlang a, Spanish midfielder Edu Beia chu tlarhnung venpui turin defensive midfield-ah a awm.

Goa tana ram pawn player bul ṭantute chu centre back Iván González leh James Donachie, winger Jorge Ortiz leh midfielder Alberto Noguera-te an ni a, Donachie hian age level-ah Australia tan a lo khel tawh tih loh chu ram tana tawnhriat sawi tur pawh an nei tam lo hle.

Blanc-a'n Al-Rayyan hi chak saah a dah duh bik lo a, fimkhur takin goal venhim an ngai tel tih hriain 4-2-3-1 formation a rawn hmang - ram pawn player-a neihte pawh an hraw hle. Tlarhmaah Ivory Coast international Yohan Boli-a mal tlat a, a thlawp turin Algeria international Yacine Brahimi-a awm a, defensive midfield-a khel Franck Kom chu Cameroon international a ni bawk!

Mahse...
Lehkhaa hming ziak leh tawnhriat aṭanga thlir mai chuan Al-Rayyan hi chak ngei tura ngaih an ni a, mahse, Ferrando enkawl Goa ngaihdan a dang thung - Qatari club lakah tlawm an tum lo.

Mikhual team tan Porto midfielder hlui Yacine Brahimi a hmuhnawm nghal a, tlarhmaah Boli-a hlauhawm viau bawk - mahse, player pahnih bakah Naif Alhadhrami leh Abdel Aziz-ten chance an nei chungin an chhawr thei bik lo.

Goan club an tumah an chiang. Tlarhnung a khawng ṭha a, rin loh takin ball an chang tam bawk. Goal lut loin chawlhlawk an hmang zui.

Second half-ah thawnthu a danglam lo. Yacine Brahimi leh Yohan Boli bawk an hmuhnawm a, goal erawh an pai tel chuang lo - Goan club tan keeper naupang Dheeraj Singh chu fak tlak a ni a, Manipur rawlthar hian level sang-a inkhelh a phu tih a pholang nawn leh ta.

Team ṭha tak kan hmachhawn avangin kan result-ah ka lawm a ni. An player-te quality chu kan hre vek a, World Cup 1998 champion Blanc-a team hmachhawn chu a awlsam lo - point khatah kan lungawi a ni. Mahse, coach thlirna aṭang chuan hmasawnna tur kan la nei nual. Champions League-a nih avangin kan goal nawr kan tih nat deuh a ngai a, kawng tinrengah inel turin kan inpeih tih pholan a ṭul. - Juan Ferrando, FC Goa coach

Sik leh sa khan nasa takin kan game-a control a, kan chance neih kan chhawr loh khan kan inkhel a ti harsa a, tlarhnung ngai pawimawh chunga inkhel Goa lamin inrintawkna an neih phah bawk. Point hnih kan hlohah ka ngai a, Persepolis nen kan inkhelh hunah chak kan mamawh dawn a ni. - Laurent Blanc, Al-Rayyan coach