Pep-a leh Man City-in semifinal an lut ve ta
Pep Guardiola kaihhruaina hnuaiah Manchester City-in a vawi khat nan Champions League semifinal an lut. Man City hian Nilaini zan khan khualmualah Borussia Dortmund 2-1 in an hneh a, Etihad Stadium-a an chak tawhna nena belhkhawmin 4-2 in hnehna an chang.
Manchester City hian semifinal-ah champion lai Bayern Munich pet chhuaktu Paris Saint-Germain an hmachhawn dawn. Final khel tur zawnna hi April 27 leh May 4 hian first leg leh second leg khelh a ni ang.
Pressure a awm
Spanish manager Pep Guardiola chuan, "Man City-in UCL nomawi kan chawi lo a nih chuan hlawhchhamna a ni ang. Kan champion erawh chuan Pep-a ṭhat zia an sawi ang," tiin amah leh Man City an teh dan tur Dortmund an hmachhawn hmain a sawi.
Man City hian 2015-16 season khan Manuel Pellegrini hoin a vawi khat nan Champions League semifinal an lut a, Real Madrid lakah 1-0 in an tlawm. Pep Guradiola hnuaiah City-in nomawi beisei mah se a tak takah chuan season hmasa paliah semifinal pawh an thleng lo.
Pep-a hnuaia season hmasa berah last 16 an lut a, away goal rule hmangin Monaco an hneh lo. 2017-18 season-ah quarterfinal an lut a, Liverpool lakah 5-1 in an chak lo. 2018-19 season-ah pawh quarterfinal an lut leh a, Tottenham nen 4-4 a inhnehtawkin away goal rule hmangin an vanduai.
Season liam ta pawh khan Man City hian quarterfinal an lut a, Covid-19 vangin single leg-a khelh niin Lyon lakah 3-1 in an chak lo. Pep Guardiola hnuaiah Man City-in UCL nomawi chawi tum mah se semifinal pawh an la thlen loh avangin 'pressure' an ngah tih hi zep rual a ni lo.
Barakhaihtu Bellingham
Man City-in nomawi an duh ang thoin Borussia Dortmund-in Champions League champion an mamawh a, Bundesliga-ah an chet ṭhat loh avangin UCL nomawi hi season thara Champions League an khelh chhunzawm theihna tur a ni.
Signal Iduna Park-ah Dortmund-in goal an khung hmasa zawk a, minute 15-na lekah English rawlthar kum 17 mi Jude Bellingham chuan box chhung chiah aṭangin mawi zetin a pet goal a, vawi leh khatah Dortmund dinhmun a ṭha zawk.
Aggregate-ah 2-2 chiah ni mah se Dortmund-in Etihad Stadium-a goal an khung avangin 'away goal rule' hmangin an tlang thei a. Edin Terzic-a hoten Man City hmachhawn turin an inpuahchah ṭha tih a lang nghal a, goal venghim tura pressure an pek danah player tinin an tih tur an tiah a ngaih theih.
A ṭul hunah sang takah pressure-ah an pe a, hun tam zawkah erawh tlar hmasa bera awm Erling Haaland telin goal venhim hna an thawk. Striker mumal nei loa inkhel bul ṭan Man City-in Dortmund tlarhnung phui ṭha tak ṭhiah an harsat.
Chutihrualin Man City captain De Bruyne-a'n crossbar a pet per a, Dortmund keeper Marwin Hitz-a'n hna nei bawk. Amaherawhchu goal ber a luh theih miau loh avangin Man City chu ṭum dang ang thoin quarterfinal-a tla thei dinhmunah an ding.
City an vannei
Man City-in hliam vangin Sergio Aguero squad-ah an dah thei lo a, bench-ah Raheem Sterling leh Gabriel Jesus te awm mah se Pep-a'n inkhel bul ṭantute chungah rinna a nghat chhunzawm. Second half-ah Dortmund tlarhnung a la khawng ṭha reng a, amaherawhchu goal hlauhawm tur pawh ni loah Emre Can-a kut a tauh per a, penalty a chawi.
Minute 55-naah Riyad Mahrez-a'n penalty hi goal-ah a chantir a, Man City dinhmun a ṭha nghal. Dortmund tan extra time thleng tur pawhin goal khung ngei a ngai tawh a, goal venhim ringawt a rem tawh lo. Emre Can a handball lo se chuan 'out and out striker' nei lo Man City an talbuai chhunzawm tura ngaih a ni a, amaherawhchu goal hlu tak an khung avangin nuam sa zawkin an khelh theih phah.
Jadon Sancho a inhliam avangin Dortmund goal nawr a na tawk lo a, Haaland-a'n Man City tlarhnung rum ṭhaih hlei thei lo. Man City hmatawnga awm De Bruyne-a goal hmaah a vannei tawk lo a, Phil Foden erawh a vannei thung.
English midfielder Foden hian minute 75-naah goal pawimawh a khung a, keeper Marwin Hitz-a'n a tih tur a ti tawk lo. Man City-in goal hnihna an khung theih avangin hun tawpah harsatna hranpa nei loin hnehna an chang.
Kan club tan chanchin lawmawm a ni a, a bik takin club chairman leh fan-te ka lawmpui. Kan club tan semifinal luh hi thil thar a ni lo a, a vawi hnihna a ni. Chutihrualin history siam kan duh. A tir minute 10 tih loah kha chuan kan khel ṭha takzet. Semifinal kan thleng hi ka lawm takzet. Europe team ṭha pali zingah kan tel a, team dang el pha turin kan inbuatsaih ang. - Pep Guardiola, Man City manager
Penalty an hmuh hma thleng khan kan khel ṭha a, kan tih tur pawh kan ti. Amaherawhchu City player-te khan an tih tur an hre chiang a, kil tinah an awm avangin ball chan a har. Team ṭha zawk a ni a, an fing zawk a ni. - Marco Reus, Dortmund captain
