Fury vs Joshua 100% in a chiang

British heavyweight boxer rothap Tyson Fury chuan mipui hmuh châk Anthony Joshua nena an inhnek tur chu a thlen ngei tur thu a sawi a, "100% in a thleng ang," a ti.

Heavyweight boxing-a thawm nei na ber pawl Fury leh Joshua hian an inhnek thlen duha dilte an thlifim mek a, Saudi Arabia lam chu he inhnek thleng thei tura langsar zinga mi a ni. WBC world heavyweight champion Fury chuan, "100% in a thlen ngei ka ring a, a thleng em em ang. Kan inhnekna hun leh hmun tur hi kan chian thuai theih ka beisei," tiin a sawi zui.

Fury hian Joshua nen an inhnek hunah hian WBC title-a kawl lai hi a chhawp dawn a, Joshua-a'n IBF, WBO leh WBA title-a kawl lai chu inchuh turin a chhawp dawn thung. Boxer pahnih hi an inhnek a nih chuan heavyweight boxing-a kawnghren lian tham pali, vawi khata an inchuh vekna hmasa ber a ni ang.

Heavyweight boxing-a 'undisputed' champion hnuhnung ber chu Lennox Lewis-a ni a, 1999 -2000 inkar khan heavyweight-a major title chu a kawl vek. Hetihlai hian WBO title chu heavyweight boxing-a undisputed ni tura kawl ngai zingah a la tel lo thung.

March thla khan Joshua promoter Eddie Hearn chuan Fury leh a boxer-ten vawi hnih fight nei tura contract an ziah thu a sawi a, mahse, a hun leh hmun tihchian theih a la nih loh thu a sawi bawk. Fury chuan tun hnaiah khan social media lamah an fight tur hi a tarlang zeuh zeuh a, boxer pahnih fight-a thlen theihna tura hmalatu ten hma an la chak tawk lo a nih chuan fighter dang hmachhawn tura a inbuatsaih tur thu thlengin a sawi.

Hetihlai hian Joshua chuan instagram lamah an fight-a thlen theih tur thu a lo tarlang ve bawk a, Joshua vs Fury inhnek thlen duh an awm thu a tarlang. Fury chuan, "Lennox Lewis leh Mike Tyson-te in fight ang mai mai a ni dawn lo a, anni kha chuan an in fight khan an ṭhat vanglai an vuiliam daih tawh a ni.

"Keini chuan kan vanglai tak ve ve kan hmang a ni. Ka mimal ngaihdanah chuan rei tak kan in fight pawh ka ring chuang lo. Krismas hmaa naupang an phur ang mai hian ka phur em em a, he fight tur hi chiang thuai se ka ti takzet a ni," a ti. Vawi 31 fight-a hmachhawna tlawm la nei lo Fury chuan a ṭhat dan bera a awm lai a nih thu sawiin, "Hetiang em em hian ka la in fit ngai lo a, hei aia ṭha zawk hian a awm theih loh.

"Kum 34 kai chhohah chuan tlakhniam lam kan pan tawh ṭhin a, tun hi he fight thlentir a hun tak a ni. Joshua nen hian kan ṭhat dan bera kan ṭhat lai ve ve a ni a, kan puitling tawh ve ve a, kan hlawhtlin vanglai tak a ni a, hnehna chang turin kan theihna zawng zawng kan hlan mai ang," a ti.

Fury hi kum 32 mi a nih laiin Joshua hi kum 31-a ni thung a, Joshua hian vawi 25 fight-a hmachhawnah vawi 24 hnehna changin vawi khat a tlawm tawh thung - a tlawm hi rin loh taka Andy Ruiz Jr. a ngam loh kha a ni a, December 2019-ah Ruiz hi a hneh let leh ngat a ni.