Tualchhung Cricket Armed Veng an chak ve ta

Mahuma Memorial 1st Division Screening Tournament khelh laiah Armed Veng chuan a vawi khat nan hnehna an chang ve ta, inhamtang tur erawh chuan vanneihna an mamawh tel dawn.

Nimin Suaka Cricket Ground, Sihhmuia inkhelah Armed Veng (166/10) hian Zemabawk Pitchers (142/10) chu run 24-in an hneh a, league round match sarih an khelh china an vawi khat chakna a ni.

League match vawi kua ṭheuh an khel dawn a, chumi hnuah a hniam lam pali chu 2nd Division-ah an tlahniam dawn. Tun dinhmunah chuan - Durtlang, Zemabawk Pitchers, Armed Veng leh Bawngkawn South te chu hniam paliah an awm mek.

Season hmasa khan hrileng vangin inelna a awm mumal thei lo, hei vang hian 1st Division aṭanga tlahniam an awm lo. Team pariat ni tur kha 10 an nih phah a, kumin hian pali an tla ṭhawt dawn tihna a ni.

Vawiin chawhma dar 9:30 hian Kulikawn leh Ramhlun Venglai an inkhel dawn. Team pahnih hi final luh tum, match ruk an khelh tawh china vawi nga ve ve chak thei an ni a, final lut tur chuan an pahnih intawna chak zawk nih hi a pawimawh dawn.

Mahuma Memorial (1st Division)
A hmun : Suaka Cricket Ground, Sihhmui

Vawiin Inkhel Tur
Kulikawn 09:30 AM Ramhlun Venglai

Nimin Inkhel Result
Armed Veng (166/10) bt Zemabawk Pitchers (142/10)
(Armed Veng hi run 24-in an chak)
Toss : Armed Veng lamin vuak hmasak an thlang
PoM : Andrew Vanlalhruaia, Armed Veng