Copa America kaltlangpui dawn

Nipui laia neih tur Copa America chu a hmuna entu awmin emaw, fans awm lo emaw pawh ni se kaltlangpui tur a nih thu CONMEBOL president Alejandro Dominguez chuan a sawi.

Argentina leh Colombia ten an inthlen ṭawm tur inelna hi nikum khan hrileng vangin a hun sawn a lo ni tawh a, kuminah hian June 13 aṭanga khelh tur ni mah se coronavirus hluar thar leh avangin an ṭhulh mai dawn nia sawi a awm hman.

South Amercia khawmualpuiah hian hri leng vanga thi leh enkawl an pung mek zel. A bik takin Brazil chu a tuar nasa niin, khawvel ram pumpuiah United States dawta mitthi ngah an ni hial.

Dominguez chuan, "Harsatna karah pawh inelna hi kaltlangpui tura tih mek zel a ni. Player leh coaching staff zawng zawngte vaccine la tura in nawr ngawt theih a ni dawn lo, hei chu team leh mimal thutluknaah kan nghat dawn.

"Mi ṭhenkhat chuan politics khelh nan hman an lo tum a ni mai thei. Keini chuan football hi kan hmangaih a, a bik takin South American khawmualpuia ramte hi chuan he infiamna hi kan ngaina zual," tiin a sawi.