Atletico laka comeback theih inring Ronaldo
Zanin dar 1:30-ah Juventus chuan Champions League last 16 second leg match khel turin Atletico Madrid an mikhual dawn a, Mizo tan menrei zan a ni!
Wanda Metropolitano Stadium-a inkhel hmasa zawkah Atletico hian 2-0 in hnehna an lo chang tawh a, Turin khawpuiah inkhel dawn mah se khualmuala goal khung lo Juventus tan lehthal an harsa dawn. Mahse, Champions League nomawi chawi duh vanga Juventus-in an lakluh Cristiano Ronaldo erawhin an comeback theih ngei a beisei thu a sawi.
Kum 34 mi forward chuan, "A eng zawnga thil thlir a ṭul a, kan chance kan hman thiam phawt chuan quarterfinal kawng a la inhawng a ni," a ti a, a beidawng duh lo.
Beiseina
Atletico Madrid hi Europe-a tlarhnung khawng ber pawla sawi an ni a, goal hnih an neih sa avangin Juve khelmualah pawh an nawr nghal pup pup lo ang tih a chiang.
Heng zawng zawng ngaihtuah hian Juve tan goal hnih phur saa khelh a harsa dawn tih a hriatthiam theih a, Mahse a zawna Champions League nomawi chawitu Ronaldo tan erawh beiseina a la awm. Juve tan match 35-a inlana goal 21 khung tawhtu forward chuan, "Team ṭha tak kan ni a, kan theihnaah hian kan chiang em em a ni. Turin-ah zan duhawm tak hman kan tum," a ti a, chak loh lam a ngaihtuah lo.
Mahse, tun season Champions League-a goal khat chiah la khungtu Ronaldo hian a thusawi hi thlentir a tum chuan Real tana Champions League-a 'Ronaldo' kha a pholan a ṭul dawn a, a chungah beiseina a sang ang.
Nang lo chu
Juventus-in Ronaldo an lakluh khan an tumah an chiang a, chu chu Champions League nomawi chawi a ni - Europe-ah champion tum kher lo ni se Ronaldo an mamawh lo.
Serie A club hian Italian football-ah chuan hneh takin ro an rel - league nomawi chu season sarih chhung a zawnin an chawi tawh a, tun season-ah pawh anmahni hnaih bertu Napoli aiin point 18-in an sang fal tawh. Ronaldo chuan, "Season duhawm tak kan hmang mek a, Serie A-ah hma kan hruai a, Italian Super Cup-ah Milan hnehin kan champion a, Champions League hi kan lawm kimna tur chu a ni," a ti.
Juventus tan tlarhnung laiah Leonardo Bonucci leh Giorgio Chiellini an pawimawh dawn a, goal khat lek pawh a chhuah hmasak chuan an dinhmun a derthawng lehzual dawn tih an hrechiang ang.
An hre lo
Atletico Madrid-in goal hniha hma an hruai chung leh tun hnai European football-a an dinhmun a ṭha zawk chungin rin an hlawh lo cheu a, Italian football-ah ro an rel miau avang leh Ronaldo an neih avangin Juve-in rin an hlawh zawk.
Mahse, tun season Champions League-ah beisei loh result a thleng nual tawh. Ajax-in Real Madrid an hnawt chhuak a, Manchester United-in Paris Saint-Germain an hneh a, Tottenham Hotspur hmaah Borussia Dortmund an mualpho a, FC Porto-in AS Roma an pet chhuak bawk.
Atletico boss Diego Simeone chuan, "Tun hnai result mak ti ho hi chuan football an en tlem a, an hre tak tak lo. Keini ang match tam tak en ṭhin chuan a mak kan ti lo," a ti! Argentine coach hian Champions League-ah chuan team an ṭhat rual vek avangin a harsa tawh tih a sawi a, eng team mah dah hniam bik a duh lo.
A awl dawn lo
Juventus coach Massimiliano Allegri-a'n Atletico nena an inkhel tur thlirin an league match hnuhnung berah player ṭha a hahchawlhtir nual a, Ronaldo pawh hahdamtir a ni.
Mahse, Atletico hi tlarhnung laia Jose Gimenez leh Diego Godín inkawp tir thei an ni a, defender ṭha pahnih hnunga ding lah Jan Oblak a ni - Ronaldo tan goal khung mai a awlsam lo ang. Juve tan Antoine Griezmann chu ven bik sual lo tur player a ni a, French striker hian tun season-ah goal 18 a khung tawh a, Juve laka khung belh a hreh dawn lo.
League match hnuhnung bera hahdamtir Alvaro Morata hi thaibo a thiang lo - Atletico-ah a ṭhat dan berin a khel chhuak leh tawh a, Juventus striker hlui hi a khelmual hriatchian saah a tlangnel ang.