All England champion Momota

Badminton inelna ngaihhlut All England Open Badminton Championship 2019 chu Pathianni zan khan a hmawr bawk a ni a, mipa singles-ah Kento Momota chuan Viktor Axelsen hnehin a champion.

World champion ni lai Momota hian 2017 world champion Viktor Axelsen lakah hian 21-11, 15-21, 21-15 in hnehna a chang a, Japanese tlangval zingah All England champion ni thei hmasa ber a ni.

Birmingham, England-a inkhel hmuh-nawmah game thumna an khelh laiin Momota a chefuh lo hmasa zawk, a tir lamah 4-0 ngawtin hnufual mah se he game bik hi 21-15 in a la let thei.

Kum 24 mi Momota chuan, "He inelna hmuna champion hi ka naupan lai aṭanga ka duhthusam ṭhin zinga pakhat a ni. Ka tan chuan hun chhinchhiah thlak tak pakhat a ni a, inrintawkna sang tak min pek belh bawk," tiin a sawi.

Hmeichhe inelna lamah a zawna vawi hnih champion tawh Tai Tzu Ying chu seeded pathumna Chen Yufei lakah 21-17, 21-17 in a chak lo. Kum 20 mi Chen hian an intawn hnuhnung 11-ah Tai Tzu Ying hi a hneh ngai lo, mahse a hun tawn tawh zinga inkhel pawimawh bera ngaihah hnehna a chang thei hlauh!

Chinese nula Chen-i chuan, "Tai nen a inkhelh hi chu harsa ka ti ṭhin hle, tun ṭumah chuan ka vanneih ni a her chhuak ve ta. Ka tan chuan badminton ka khelh tawh china ka hun tawn ropui leh chhinchhiah thlak ber a ni," tiin a sawi.

Kum 2014 khan Wang Shixian-i'n All England nomawi hi a chawi a, Shixian hnuah chuan Chinese nula zingah Chen-i hi Birmingham-a nomawi chawi leh thei hmasa ber a ni.

All England singles champion hian Rs 48,86,630 an dawn bakah ranking point 12,000 a hmu a, final-a chak lo zawkin Rs 23,73,506 a dawn bakah point 10,200 a hmuh belh thung.