Qatar GP-ah Dovizioso vannei

Bike intlansiakna sang leh ngaihhlut ber MotoGP season chu Pathianni khan ṭan a ni a, intlansiak hmasa ber Qatar Grand Prix-ah Ducati rider Andrea Dovizioso chuan champion lai Marc Marquez lakah second 0.023 chauha hma zawkin hnehna a chang.

Intlansiak hmuhnawm takah season hmasa ang bawkin Dovizioso hian corner hnuhnung berah nalh takin Honda bike khalhtu Marquez a dang thei a, anni pahnih hi tun season chhungin an inum chho a nih pawhin a mak dawn lo.

LCR rider Cal Crutchlow-a'n podium lawn turin pathumna dinhmun a luah a, Suzuki rider Alex Rins hnungah vanglai hmang liam mek Valentino Rossi a thleng. 14-na dinhmun aṭanga tho chhuak thei Rossi tan pangana nih hi result ṭha a ni.

Kum 32 mi Dovizioso chuan, "Marc khan tun hma lama a tih fo tawh angin a tawpah khan min tlan pelh a tum na hle. A tlan chakin a huaisen a, hnehna a chan theih nan theih tawp a rawn chhuah laia ka dinhmun ka venghim thei kha a lawmawm.

"World champion lai hma a thlengin hnehna ka chang a ni a, kei leh team tan chuan bul ṭanna ṭha tak a ni. Bike intlansiakah chuan a changin risk kan lak a ngai fo, tun ṭumah chuan a tir lam harsa deuh mah se a hmawr bawkna erawh duhawm tak a ni," tiin a sawi.

MotoGP champion lai Marquez chuan, "Season hmasa ang bawk kha a ni, duhthusam ni lo mah se point 20 hmuh hi ka tan a ṭha. Rider kan tam a, bike ṭha tak tak vek an khelh, podium lawn phak china awm hi chu engtik lai mahin a chhe ngai lo," a ti.

Season hmasa tawp lama hliam tuar Cal Crutchlow pawh ṭha takin a tlan thei a, British rider chuan, "MotoGP inelna huanga tel leh theih hi a lawmawm, ka tan pawh season bul ṭanna ṭha tak a ni," tiin a sawi.

Kumin Moto GP inelnaah hian intlansiak vawi 19 a awm dawn a, GP pahnihna atan March 31 hian Argentine Grand Prix an tlan dawn. A hnuhnung ber chu November 17 hian Valencia GP an tlan ang.