Goa khelmualah Mumbai leng dawn

Indian Super League semi­final second leg-ah zanin hian FC Goa chuan Mumbai City an mikhual dawn a, inkhel awmze nei tawh lo ang hiala sawi theih a ni - first leg-ah FC Goa hian 5-1 in hnehna an chang tawh.

Mahse, Goa coach Sergio Lobera chuan, "Football-ah chuan eng pawh a thleng thei a, thil thleng tam tak kan lo hmu tawh a ni. Kan inringtawk leh lutuk ang tih ka hlau a, first leg ang tho khan second leg pawh kan inbuatsaih ang," tiin a ṭawng uang duh lo.

Hetihlai hian Mumbai coach erawhin awmze nei lo inkhel a nih tur thu a sawi - a beisei a bo hle. Mumbai City coach Jorge Costa chuan, "Thil mak hi ka rin zawng a ni lo a, result hi kan thlak danglam theih ka beisei tawh lo. Mahse, professional kan nihna angin ṭha takin kan khel ang," a ti a, a ngaihdan dik tak a sawi.