Arsenal-in Solskjaer-a United an tukdawl

Emirates Stadium-ah vanglai hun hmang mek Ole Gunnar Solskjaer kaihhruai Manchester United an lenglut a, Arsenal-in Granit Xhaka leh Pierre-Emerick Aubameyang te goal hmangin an mikhual hi 2-0 in an tukdawl a. London club hi Premier League table-ah palina niin, United chungah an awm.

Pathianni zan Premier League inkhel dangah Champions League khelh tum Chelsea-in injury time-a Eden Hazard-a goal hmangin Wolverhampton Wanderers 1-1 an draw hram a, point khat hlu tak an hlawh chhuak.

France tlawhtute
Manchester United-in first team player 10 tel loin France champion Paris Saint-Germain chu an mual Le Parc des Princes-ah 3-1 in an hneh a, inlehthlana ropui thlentirin Champions League quarterfinal an lut.

Arsenal pawh Rennes tlawhin an zin chhuak a, Gunners khingpui hi Ligue 1-ah pariatna dinhmun hauh mek an ni a, hmahruaitu PSG an phak lohna chu point 31 a tling. Amaherawhchu, English club hi 3-1 in an chak lo a, Unai Emery hoten khaw eng an hmu ngam lo.

Laipui a puak
Premier League club history-a club inhal ber zinga mi pahnih an intawng a, inkhel pawimawhah Arsenal an ding chang. Minute 12-naah Granit Xhaka chuan box pawn aṭangin a pet goal a, David De Gea-a'n a chhutsual. Spanish keeper tih ṭhat tawk loh sawi zui nasa mah se Swiss midfielder hi 'long shot specialist' a ni a, a ball pet kual dan mak tak avang chuan fak a phu hle.

Arsenal tlarhnung chu ṭum dang zawng aiin a phui ṭha a, Mesut Ozil leh Aaron Ramsey te chu an khel cheimawitu a ni a, goal khungtu Xhaka chu United chhuanvawr Paul Pogba dahṭhatu a ni thung. Second half-ah Alexandre Lacazette chu box chhungah thiam takin a tlu a, Fred-a tawnhriat neih tlemna langin penalty a chawi. Arsenal tan Tottenham Hotspur laka penalty hlahtu Aubameyang chuan keeper De Gea bumin chak nemnghehna goal a khung.

Gunners boss Unai Emery chuan, "Clean sheet kha a pawimawh a, khelhdan phung thlak hret a, player siksawi chunga hnehna chan kha a pawimawh bawk. Hma kan sawn a, inrintawkna kan nghah a, hahchawl thei erawh kan ni lo. Champions League khel tura kan elpui Manchester United, Chelsea leh Tottenham te nen hian insi chatin kan la awm reng a ni," tiin a sawi.

Gunners an pawr
Arsenal ṭantute chuan 'Tottenham Hotspur, kan rawn pan dawn che u' tiin an au rual a, an hmelma club chunga awm ngei an tum. Tunah hian Gunners hian Spurs hi point khat chiahin an pha tawh lo.

Gunners hian season tawpa Tottenham chunga an awm hian 'St Totteringham’s Day' an hmang ṭhin a, tunah chuan Champions League khelh phak chauh ni loin he ni danglam leh hlu tak hi an thlir thei tawh ang.

Keeper ṭha mi Leno
Arsenal hian Jens Lehmann hnuah keeper ṭha bik an nei leh tawh lo a, ṭha ṭhin Petr Cech erawh an kawl thung. Tunah erawh German keeper Bernd Leno an nei a, 'ṭha bik' tiha chhalna atan a la hma a nih pawhin a hlat tawh lo.

Kum 27 mi Leno hian 'North London Derby'-ah Arsenal a chhanhim tawh a, Manchester United laka point thum an hmuh theihna chhanah a pawimawh hle. Arsenal keeper hian Romelu Lukaku goal khung tur chu first half leh second half-ah a dan sak ve ve a, an pahnih chauha inhnaih chilh ve ve an nih avangin save ṭha bik an ni. German keeper hi ball sem thiam Man City keeper Ederson te nen huang khatah dah theih a ni bawk.

Club lian ngam lo Lukaku
United striker Lukaku-a'n match hnuhnung pathumah goal hnih ṭheuh a khung thei a, goal khung thei tak striker ni mah se Premier League club lian lakah a zuih leh ṭhin. Gunners nen hian keeper vawi hnih a hmachhawn hnuah a ti goal lo a, hnai tak aṭangin crossbar a tih per bawk.

Belgian striker hian United kawr a hak hnuah 'big 6' tiha chhal club lian hi vawi 18 a hmachhawn tawh a, goal khat chiah a la khung. Lukaku kawppui Marcus Rashford pawh mawhphurhna zawng zawng phur tur atan chuan a la puitling tawk lo a, midfielder Fred pawh a chet ṭhat zanah a hmawr bawkna tur tak a tihsual ṭhin bakah penalty chawitu a nih avangin an chak lohna chhana puh theih zinga mi a ni.

Dinhmun hniam lai ber
Norwegian manager Solskjaer hnuaiah United-in league bikah match 10-ah hnehna an chang a, vawi hnih inhnehtawkin Arsenal laka an chak loh hi an tlawm hmasak ber a ni.

United manager lailawk Solskjaer chuan, "Chak kan phu miah loh ṭumin kan chak a, tun ṭumah erawh chak lo tur chu kan ni lo. Chance ṭha vawi nga kan insiam a, woodwork vawi hnih kan tihper bawk," tiin a sawi a, hetihlai hian Arsenal boss Unai Emery erawhin chak an phu tih a sawi thung.

Solskjaer chuan sawi chhunzawmin, "Kan khel ṭha a, kan result erawh a pawi takzet a ni. Spurs kan hnaih theihna tur hun ṭha kan hloh a, United ka enkawl hnua kan dinhmun hniam ber ṭum a ni," tiin a sawi.