Pro Fight hmawr bawk zan

Yodha 4x4 Pickup LPS Pro Fight chu zanin hian a hmawr bawkna neih a ni dawn a, R. Dengṭhuama Indoor Stadium, Mualpuiah zan dar 8:00 aṭangin 'Title Fight' neih tur niin inhnek panga a awm ang.

Title Fight-a chakin champion kawnghren leh Rs 50,000 an dawng ang a, a chak loin Rs 20,000 an dawng ang. Zanin hian Fighter of the Night, Best Referee leh Best Judge thlan a ni ang a, mimal lawmman hi GIG Motors tum a ni.

Lightfly
Tualchhung boxing sawi rualin rilruah NT Lalbiakkima a rawn lang nghal tawh a, New Siaha boxer hian a zawna vawi nga nan champion a tum. Pro Fight hnuhnung bera a hneh F. Zoramchhana nen kawnghren an inchuh nawn ang.

Lightfly vawi li champion tawh NT Lalbiakkima chuan, "Kum tluanin boxing hi ka khel a, inbuatsaihna ka neih ṭhat tawk avangin ka champion nawn ka ring," tiin Vanglaini a hrilh a, Kazakhstan President's Cup-a world number 1 leh Olympic gold medalist Hassanboy Dusmatov hneh theitu hian inrintawkna a nei sang hle.

Kum 19 mi Zotea'n an intawn hnuhnung berah Biakkima hi round tinah a ngam lo vek. Mahse, amah aia kum thuma upa leh inches ruka hniam zawk hi hneh let a tum. Cherhlun rawlthar chuan, "2014 aṭangin boxer ka khel a, tawnhriat ka nei ve tawh. Tun ṭumah hian NT-a hneh let theih ka inbeisei," tiin Vanglaini a hrilh ve bawk.

Lightheavy
Pro Fight weight ṭhen hrang pahnih - middle leh lightheavy huanga champion kawp thei awmchhun HC Johnkenty Vallalhlimpuia'n a vawi nga nan tualchhung boxing inelna a champion a tum. Tuipui boxer hmaah hian Hrianghmun tlangval DK Munga a ding dawn.

Vanglaini zawhna chhangin Johnkenty chuan, "Ka damloh hnuah kar khat chhung inbuatsaihna ṭha takin ka nei leh tawh a, champion nawn ngei theih ka ring," tiin a sawi. Kum 23 mi boxer hian amah aia upa zawk lakah zahngaihna lantir a tum lo.

Title Fight a thlen theih nana Jack Lalsangliana knockout tu Munga pawh a zam bik lo. Assam Rifles boxer Munga chuan, "Game a nia chak zawk tur a sawi lawk theih loh, chak tur chuan vanneih a ngai bawk," a ti.

Inhnek dang
Bantam huangah kum 30 mi, Dinthar boxer Zonuntluanga'n vawi thum champion zawn a tumna kawngah amah aia kum 10-a naupang Laldingliana a paltlang a ngai dawn. North East Games-a an intawn ṭumin Dingliana hian hnehna a chang tawh a, an inhlau lo tawn ang.

Govt. Complex boxer Lalrinawma'n a vawi khat nan lightweight title humhim turin Vanlalawmpuia a hmachhawn dawn. Rinawma hian tawnhriat a ngah tawh a, chutih laiin Khuangthing boxer Awmpuia hi tun Pro Fight neih lia hmuhnawm berte zinga mi a ni thung.

Middle champion lai Zarzoliana'n title a kalsan avangin C. Lalduhawma leh H. Lalrinhluna ten a vawi khat nan middleweight champion nih tumin kawnghren an inchuh dawn.