English club 2 hnung zui tur Man City

Premier League club Manchester United leh Tottenham Hotspur ten Champions League quarterfinal an lut tawh a, Manchester City-in zanin hian an hnung a zui a rinawm. Pep Guardiola hoten zanin dar 1:30 hian Etihad Stadium-ah Schalke an mikhual dawn.

English club hian first leg-ah German club hi 3-2 in an lehthal a, hemi ṭuma minute 90-naa chakna goal khungtu Raheem Sterling chuan match hnuhnung bera Watford an hneh ṭumin hattrick a siam.

Spanish manager Pep Guardiola chu Juventus nen sawi zawm ni mah se English club lakah a rinawm thu a tichiang a, hei hian club chhung boruak a tih ṭhat phah ang. Pep chuan, "Kum hnih contract ka la nei a. Man City hian min ban a nih loh chuan chhuah ka tum lo a, contract ziah belh pawh ka hnial lo," tiin a rinawm thu a sawi.

Chutihrualin City hian hrem vangin Nicolas Otamendi leh Fernandinho te an chhawr thei dawn lo a, Schalke tan hna hau tak hi a tiziaawm ang. Hei bakah hian Man City hian Champions League knockout match hnuhnung pahnih an mual Etihad Stadium-a an khelhah an chak lo - March 2018 khan Basel an hneh lo a, April 2018-ah Liverpool lakah an tlawm leh bawk.

Amaherawhchu, Schalke hian Man City an hneh loh hnuah Mainz (3-0), Fortuna Dusseldorf (4-0) leh Werder Bremen (4-2) te lakah an tlawm vek a, an chak lo satliah lo a, goal thum leh aia tam vek an chhuah avangin English club lehthal tur chuan an insiam ṭhat viau a ṭul ang.