Real Madrid-in an fapa rangkachak Zidane an ko kir
Thla 10 liam ta khan Zinedine Zidane chuan, "Ka kaihhruaina hnuaia awm induh loh avangin hreh takin chungin ka chhuah a ṭul a ni," tiin Real Madrid a chhuahsan. Hmangaih hmasa a la thi lo a, an hliam tawrh mek tuam dam tumin French manager Zidane hian ngen ngawl taka president Florentino Perez sawmna chu a pawm a, kum 2022 thleng daih contract a ziak.
Kum 46 mi Zidane hian Santiago Solari a thlak a, president Florentino Perez chuan, "Khawvel manager ṭha berin min rawn zawm leh ta, rilru thu hmunin kan thawk ho ang," tiin Thawhṭanni khan chhuang takin an manager thar hi a tlangzarh. A inkhelh hun laia khawvel player ṭha ber zinga mi Zidane hian Los Blancos hi kum thum a zawna Champions League nomawi a chawipui theih avangin a chhuanawm a, La Liga-in ngaihven a hlawh sawt ang.
Vul chhung rei lo Solari
Real Madrid hian season liam ta tawp ruala Zidane an ban hnuah Spain coach Julen Lopetegui an lalut a, manager thar hi nikum October 29 khan ban a ni. Madrid Castilla (B Team) enkawltu Santiago Solari chu manager lailawk tura lakluh nghal a ni a, Argentine manager hi result ṭhain a umzui avangin November 13-ah hna nghet pek a ni a, kum 2021 daih contract a ziak bawk.
Amaherawhchu Solari hnuaiah Real chu khawchhak chhuak 'duplicate' ang chauh an ni a, kar hnih chhung lekin tun season-a an beiseina zawng zawng chu a thamral. Copa del Rey-ah an hmelma Barcelona lakah agg-ah 4-1 zetin an tlawm a, Santiago Bernabeu-ah 3-0 in an chak lo, ni thum hnu lekah an bu zawlah hian Barca lakah bawk 1-0 in an tlawm nawn a, La Liga-a Catalan club an phak lohna hi point 12 a ni.
Zahna kawn an zawh mek lai chu pawh seiin a awm a, khualmuala 2-1 a an hneh tawh Ajax lakah 4-1 in an mualah bawk an tlawm a, Champion League aṭanga an tlak leh tak avangin tun season-a an nomawi beiseina zawng zawng a tawp. Pathianni zan khan Real Madrid hian Valladolid chu 4-1 in hneh mah se khualmuala an chakna hian Santiago Bernabeu a chhun eng zo lo.
Club president Florentino Perez chuan, "He club tan hian sulhnu ṭhahnem tak a hnutchhiah a, Real Madrid hi a hmangaih. A duh a nih phawt chuan a hna tur kan siam sak ang," tiin ṭha takin a thlah. Argentine coach hi 90s tawp lam aṭangin Madrid khawpuiah hian an chhungkuain an inbengbel a, Atletico Madrid-ah bul ṭanin Real tan hian Zidane te nen hian an khel ho ṭhin a ni.
Fapa rangkachak
Real Madrid-in khawvel player manto ber ni tura Zinedine Zidane an lakluh lai hre pha Los Blancos ṭantu tan chuan manager hna kum hnih leh a chanve a chelh chhung thai bo pawhin lawmna tham a tling ang.
Champions League nomawi an chawina tura Bayer Leverkusen lama a volley mawi tak hmutu te thinlungah zung a kaih thuk avangin theihnghilh theih a ni lo a, kum 2002 La Liga inkhela Deportivo La Coruna lama a goal mawi khung zawhah inkhel en ve tu basketball legend Magic Johnson chuan, "Magic leh Michael Jordan dah kawp a ni," tiin a fak chiam tawh a, mi bik a ni.
Manager hna a chelh hnuah pawh Zidane hi mi bik tho a la ni a, kum hnih leh a chanve chhungin Real Madrid hi nomawi pakua lak puiin Champions League nomawi pathum bakah La Liga nomawi a tel. French manager chuan, "Real Madrid hi a awmna hmun taka dah let ka duh a ni. Madrid-ah hian mahni ṭul ang tiin ka khawsa ve reng a, tunah chuan ka awm hahdam tawh a. He club ropui tak enkawl tur hian ka inpeih leh tawh a ni," tiin a sawi.
Kum liam ta lawka Real Madrid mangṭha tu hian tun season-ah nomawi a beisei thei tawh lo a, nimin khan training ṭanin match 11 khelh hmabak zinga hmasa ber Celta Vigo (March 16) atan an inpuahchah nghal. Tun season-a Zidane hmabak chu season thara Champions League khelh bakah club zahawmna humhim a ni ang.
Hmachhawp lian zawk?
Real Madrid legend Zidane hian season liam ta zawha club a chhuahsan chhan ber chu club president Florentino Perez nen an thu a inhmuh loh vang a ni. French manager hian Cristiano Ronaldo chhuahtir a duh lo a, club president Perez duh dan ni loin a duh danin squad din thar a duh a, an thu inhmuh loh vanga chhuak a ni.
Tun ṭuma Zidane a rawn let leh takah chuan 'thuneihna' a rawn chhawm tel tura ngaih a ni a, club lamin 'ropuina' a ken tel an beisei ang. Tun hmaa player langsar an lakluh tam vanga Galácticos an tih ṭhin hian sum hman tur an ngah a, Neymar leh Kylian Mbappe te hming chu a ri ring zinga mi a ni a. Club president Perez chuan French rawlthar duhawm Mbappe chu France legend hian a hmin theih a beisei thu a sawi chhuak a, transfer boruak thlengin a ngaihnawm dawn.
Real Madrid boruak a ṭha lo a, captain Sergio Ramos leh president Perez te dressing room chhungah an ngaihdan tlang taka sawiin an inhnial a, heng zawng zawng thlir chuan Zidane-a chinfel tur hi khelmual chhung chauh ni loin club chhungkaw boruak tihṭhat pawh a ni tel.
Zidane@Real Madrid
Coach
3 European Cups
2 Club World Cups
2 UEFA Super Cups
1 LaLiga title
1 Spanish Super Cup
Player
1 European Cup
1 Intercontinental Cup
1 UEFA Super Cup
1 LaLiga title
2 Spanish Super Cups