IAAF-in Russia hrem chhunzawm zel

International Asso-ciation of Athletics Federations (IAAF) chun Russia an hremna hlip tura ngenna nasa tak hmu mah se an dinna ngaiah an la din tlat thu an sawi a, thu chhuah thar an neih hma chuan hremna an ken tlang tur thu an sawi bawk.

Russia hi 2015 November thla aṭang khan hrem an ni tawh, hrem an nih chhan hi an ram sorkar hriatpuina ngeia an infiammi ten dan an bawhchhia tih hmuhchhuah a nih vang a ni. Summer Olympic leh Winter Olympic-ah te neutral athlete angin an inlan phah tawh a ni.

Infiamna lama ram ropui tak pakhat Russia hian a vawi 10 nan IAAF hnenah hrem an nihna hlip turin an ngen nawn leh a, mahse IAAF chuan an ram khawpui Moscow-a anti doping laboratory chhunga sample leh data awmkhawm te endik nawn an remti a nih loh chuan hremna hi hlih sak an tum lo.

World Anti-Doping Agency (WADA) leh International Olympic Committee (IOC) te pawhin Russia hremna hi a la kaltlangpui. IAAF hotupa Rune Andersen chuan, "Thil lian tak pahnih a awm a, kan beisei ang thil a thlen phawt loh chuan thutlukna thar siam theih a ni lo ang," tiin a sawi.