Formula 1-ah kalphung thar

Car intlansiakna sang ber For­mula 1-ah tun season aṭangin kalphung thar pakhat langsar tak hman a ni dawn, lap khat (vawi khat tlan kual) chhunga tlan chak ber tan point hmuh belh theih a ni dawn.

Driver tan chanchin ṭha a ni a, mahse bonus point hmu tur chuan Grand Prix an tlanah 10-na china an thlen ngei a ngai dawn a ni. Thawhṭanni khan motosports thuneitu sang Federation Inter­nationale de l'Automobile chuan an thutlukna hi an puang a ni.

F1 managing director Ross Brawn chuan, "F1 hmasawn theih nana ruahman a ni a, inelna a ti ngaihnawm bawk tura ngaih a ni," a ti a, Mercedes team boss hlui hian an ruahmanna hi hun rei tak aṭanga ngun taka zirchianna an lo neih tawh thu a sawi bawk.

Tun season chhunga intlansiak hmasa ber atan March 15-17 chhung hian Melbourne-ah Australian Grand Prix an tlan dawn. Champion lai chu Lewis Hamilton niin, Britain tlangval team Mercedes chu champion lai an ni tel bawk.