Indian Wells -ah Alexander Zverev a chak lo
BNP Paribas Open, Indian Wells-ah Serena Williams chu damlohna vangin a inhnukdawk tawh a, mipa singles seeded pathumna Alexander Zverev leh hmeichhe player Anastasija Sevastova te pawh damlohna vang bawkin harsatna an tawk.
German tlangval Zverev hi nimin zing khan a hnampui world number 55 Struff lakah 6-3, 6-1 in a chak lo. Zverev chuan, "Kar hmasa tluan deuhthaw khan ka khua a sik a, tun ṭuma kan inkhelh pawh hian ka la nuam thei lo," tiin a sawi.
Hmeichhe singles lamah pawh Sevastova chu Anett Kontaveit lakah 5-0 in a hnufual laiin a inhnukdawk a, a khelh zui theih loh chhan hi damlohna vang niin a sawi ve bawk.
Mipa world bumber 1 Novak Djokovic erawhin natna nei loin a khel thei. Mahse, Serbian star hi Philipp Kohlschreiber nen set hmasa bera game khatna an khel hman chauh tihin ruah surin a tibuai a, inkhelh chhunzawm theih a ni rih lo.
Canadian tlangval Milos Raonic erawhin inkhel inhnehtawk takah Marcos Giron chu 4-6, 6-4, 6-4 a hnehin last 16 a invaw kai a, player langsar dang Dominic Thiem, Ivo Karlovic leh Gael Monfils te pawh an tlang ve bawk.