Bengaluru hmaah Highlanders zinkawng a tawp ta

NorthEast United-in ISL awm hnua a vawi khat nan semifinal lut mah se final luh an beiseina erawh a thamral a, Thawhṭanni zan khan Bengaluru chu semifinal second leg-ah 0-3 in an ngam lo.

Guwahati khawpuia team pahnih intawn hmasakah NorthEast United hian 2-1 in hnehna an chang a, beiseina sang tak nen Bangalore khawpui an pan.

Mahse, Highlanders hian tlarhmaah an chhuanvawr, Paris St-Germain striker hlui Bartholomew Ogbeche leh midfielder Rowllin Borges an chhawr thei lo a, an tuar tih loh rual a ni lo.

Minute 70 chhung zet chu Bengaluru hi chelh thei mah se minute 72-naa Miku-a'n goal a khung hnuah erawh an ṭang zo ta lo a, Dimas Delgado leh Sunil Chhetri ten goal khat ve ve khung zuiin Bengaluru an chak chiang.

Thawhlehni zan inkhelah Highlanders tan a ṭha lo zawnga thleng thei zawng zawng chu a thleng a ni ber - captain Robert Lalthlamuana chu inkhelh hmaa warm up neih a nih laiin a inhliam a, Khawzawl tlangval hi a inlan thei lo zui. Uruguayan midfielder pawimawh Federico Gallego chu second half minute 10-na lekah lakchhuah a ngai bawk.

NorthEast tan hian K. Lalṭhathanga leh Lalrempuia Fanai te chuan inkhel bul an ṭan a, an team erawh an chhanhim zo lo - ISL final hi Pathianni zan dar 7:30-ah khelh a ni ang.

ISL Semifinal
1st Leg : March 7, Ningani
NorthEast United 2 - 1 Bengaluru FC
NE : Redeem Tlang 20'; Juan Cruz Mascia 90+5'
BFC : Xisco Hernandez 82'

2nd Leg : March 11, Thawhṭanni
Bengaluru FC 3 - 0 NorthEast United
BFC : Miku 72'; Dimas Delgado 87'; Sunil Chhetri 90+2'
Agg-ah Bengaluru FC 4-2 in an chak
* Final hi March 17, Pathianni zan dar 7:30 hian Mumbai Football Arena-ah khelh a ni ang.
* Nizan khan semifinal hnuhnung zawk second leg khelh a ni a, FC Goa-in first leg-ah Mumbai City chu 5-1 in an sawp.