FA Cup Semifinal : Zanin dar 10-ah Chelsea Vs Manchester City
FA Cup-ah final ai mahin semifinal a hmuhnawm zawk a rinawm. Zanin dar 10 hian Wembley Stadium-ah Chelsea leh Manchester City te an inkhel dawn. Thomas Tuchel-a hote leh Pep Guardiola hote inhmachhawn tur hi final ai pawha hmuhnawm tur zawka ngaih chu a ni.
Semifinal hnuhnung zawk hi Pathianni zan dar 11:00-ah khelh a ni dawn a, Leicester City leh Southampton te an inhmachhawn ang.
FA Cup a hlu
Pep Guardiola kaihhruai Manchester City hi Champions League, Premier League, League Cup leh FA Cup-ah champion rinkai an ni vek. Season khata nomawi pali beiseina chhawm nung tur hian Chelsea an hneh ngei a ṭul a, Guardiola hote duh ber chu Champions League ni mah se FA Cup hi an hlimna belhchhahtu a ni thei ang.
Man City ang thoin Chelsea-in Champions League semifinal an lut a, Real Madrid nen an inhmachhawn dawn. Thomas Tuchel-a hnuaiah Chelsea-in nasa takin hma an sawn a, nomawi pahnih nena season an khar an tum dawn a ni.
Intawnna hmasa
Chelsea leh Man City te hi nikum November khan an inkhel a, Eithad Stadium-ah mualneitu 2-1 in an chak. Chutihrualin tun season-a an intawn hmasak kha chuan Blues hi Frank Lampard-a hnuaiah an khel a, tunah erawh Chelsea hi Tuchel-a hnuaiah an khel thung.
Tuchel-a enkawl Chelsea hi team dang daih an ni a, German manager hian English manager Lampard ang lo takin player tawnhriat nei ngah a dah pawimawh. Tuna Chelsea hi chu eng team pawh hneh thei turin an ṭha tawk.
Chutihrualin Blues khingpui tur Man City hi tun dinhmuna khawvel club ṭha ber zinga chhiar tel a ni a, Pep Guardiola-a naute goal nawr a nat bakah tlarhnung a rem phui tel avangin tun season hi a vanglai tiha chhal theih a ni. City hi final khel tura rinkai zawk an ni dawn a, amaherawhchu Pep-a hote hian league match hnuhnung berah Leeds United 2-1 a an hneh loh avangin FA Cup semifinal-ah hian engpawh a thleng thei ang.
Foxes hmaah Saints
Leicester City-in season bul an ṭan ṭhat hnuin season tawp lamah an talbuai mek. Foxes hian season tharah Champions League khelh ngei an duh a, tunah pathumna dinhmun la luah mah se an duh ber Europe-a inelna sang bera inlan lo thei dinhmunah an ding.
FA Cup-a champion hian Europa League chauh an khel pha a, chutihrualin Foxes tan nomawi chawi hrim hrim hi a pawimawh. Brendan Rodgers-a hnuaiah nomawi an la chawi lo a, tun season hi hun ṭha a ni thei ang.
Southampton erawh Premier League aṭanga an tlak loh chuan an lawm a rinawm a, chuvangin FA Cup-ah an insawrbing thei ang. Saints hian final thlen tumin sa huai an ser dawn a, Foxes nena an inkhel turah hian rinkai zawk an awm lo.
