Number 1 Djokovic a tla

Novak Djokovic chu tun season bika a vawi khat nan a chak lo. Monte Carlo Masters khelh laiah Djokovic hi Dan Evans hneh loin last 16-ah a zinkawng a tawp a, player pahnih an intawn vawi khatnaah Evans zawk a dingchang.

Ningani zan inkhelah Djokovic hi chak tura rinkai zawk a ni. Mahse, inkhel inhnehtawk takah world number 1 Djokovic hi 6-4, 7-5 in a chak lo. Australian Open title a lak hnua tournament a khelh hmasak berah beisei a phak lo.

Britain tlangval Evans hian a match lehpekah chuan David Goffin a hmachhawn leh dawn, world number 33 hian seeded pangana Alexander Zverev 6-4, 7-6 (9-7) a hnehtu world number 15 Goffin a hmachhawn leh ang.

Djokovic chuan, "Chhuanlam siam tur ka nei lo, tun aia ṭha zawka khel tur kha ka ni. Mahse ka ti thei ngang si lo, ka khingpui Evans kha a tlan taimain a chak em em a, ka tan chuan a harsa ve bawk a ni," a ti.

Inkhel dangah erawh Rafael Nadal tan harsatna a awm lo. Vawi 11 a champion tawhna hmunah Nadal hian Grigor Dimitrov 6-1, 6-1 a hnehin quarterfinal a lut a, champion tura rinkai a ni zel.

Player ṭha Stefanos Tsitsipas pawhin Cristian Garin lakah 6-3, 6-4 in hnehna a chang a, Greek tlangval hian a match lehpekah Alejandro Davidovich Fokina a hmachhawn leh ang - anni pahnih zinga chak zawk hi Nadal tana elpui hautak tura ngaih an ni.