AFC Champions League : FC Goa tan fiahna hautak a inchhawp zel
Zanin dar 8:00-ah FC Goa chuan Champions League match an khel dawn a, United Arab Emirates (UAE) club Al Wahda nen an inkhel dawn - inkhel hmuhnawm a beisei ngam ang.
Goa hian an awmna Group E-ah chuan team ṭha lo ber ang hiala ngaih theih an ni a, mahse, an match hmasa berah club ṭha huang chhunga mi Al-Rayyan chu 0-0 a an inhnehtawkpui avangin en hniam ngawt chi an ni lo.
Hei mai a ni lo - Covid-19 vangin group E inkhel zawng zawng hi Goa-ah khelh a ni vek dawn a, Indian Super League club-in an khelmual hman thiam sa an hman bik avangin an khingpuite aiin an dinhmun a ṭha sa zawk. Al-Wahda hian an match hmasa berah Iranian club ṭha Perspolis chu 1-0 in an ngam lo a, zaninah an chak loh leh chuan last 16 luh beiseina a hniam nghal rawih thei dawn - hei vang hian chak tumin an khel ang.
Al Wahda chu
Match hmasa bera Perspolis an ngam loh vang ngawtin Al Wahda hi dah hniam chi an ni lo - an coach Henk ten Cate hi Ajax pawh lo enkawl tawh a ni a, Barcelona leh Chelsea lamah assistant coach hna a lo chelh tawh bawk.
Hei mai a ni lo - Cate hian UAE bakah Chinese Super League, Qatar Stars League leh Saudi Premier League lamah club a lo enkawl tawh ṭhin a, Asian football hrechiang sa a ni. Al-Wahda hian UAE Pro-League nomawi chu vawi li ngawt an lo chawi tawh a, AFC Champions League-ah vawi 12 an inlan tawh bawk. Goa ai chuan tawnhriat an ngah deuh.
Chutihrual chuan Al-Wahda hian UAE Pro League khelh mekah pariatna an hauh pha ṭawk a, match thum khelh tur an la nei - tualchhung football-a beisei an phak lohna hi Champions League hmanga thup mawi an tum ang.
Players an ṭha
Al-Wahda hian coach an neih ṭhat piahlamah players pawh an nei ṭha a, Goa tan point thum hlawhchhuah chu thil harsa a ni dawn - tlarhmaah Tim Matavz an nei a, ani hi Slovenia tan vawi 38 inlana goal 11 khung thei a ni.
Kum 32 mi striker hian Dutch club PSV Eindhoven, Serie A club Genoa leh Bundesliga club FC Augsburg tan pawha lo khel tawh a nih avangin Goa tlarhnung chhaih mangang turin a ṭha tawk ang. Midfield-a khel turin South Korea international Lee Myung-joo an kawl a, Syria forward Omar Kharbin hian European football la tem bik lo mah se kum 2017-a Asian Footballer of the Year ni thei a ni a, Goa tan ven bik a ṭul dawn.
Tlarhnunga khel turin Lucas Pimenta a awm a, Brazilian defender hi kum 20 mi lek a la nih avangin tha za rual lek a ni a, FC Goa tlarhma lamah Jorge Ortiz leh Ishan Pandita khelh ṭhat a pawimawh tihna a ni.
Al Wahda vs Goa
Perspolis laka an chak loh ṭumin Cate-a'n 4-3-2-1 hmangin a player-te a rem a, zaninah chak an mamawh dawn avangin Goan club hi a nawr nghal a nih pawhin a mak lo ang.
Goa-in an match hmasa bera Al-Rayyan chelh turin defensive game mawi bik an pholang a, coach Juan Ferrando-a'n 4-1-4-1 hmangin an khingpui team a ti beidawng chiang hle. Zaninah pawh Goan club tan pawngpaw nawr ai chuan fimkhur taka khelh a ṭul ang tih a hriat a, si ban nghaktu Dheeraj Singh-a'n keeper ṭha tak a ni tih a pholan leh a ṭul bawk ang.
Midfield-ah captain Edu Bedia chuan tlarhnung venpui hna a thawk lehin a rinawm a, La Liga lama Racing Santander tana lo khel tawh midfielder khelh dan hian Goan club dinhmun tur thui takin a hril dawn.
India tan
AFC Champions League-ah Indian club an la inlan ngai lo a, tun hi a vawi khatna a ni. Hei vang hian Goa pawhin inelna hi an la thutak lehzual a, a sang thei ang ber thlen an tum.
Champions League khelh ṭan a nih hma khan Goa coach Ferrando chuan, "India hming a ṭhat theih nan theihtawp kan chhuah ang," a ti a, Al-Rayyan lakah a thusawi dikna kan hmu tawh. Zaninah pawh Goa tan tha thlah loa inkhelh a pawimawh a, group E-ah chuan Al-Wahda hi a harsa lo ber tur ang hiala sawi theih a ni bawk.
Heng zawng zawng thlir hian Goan club tan point khata lungawi mai lo a, point thum beisei ngam a pawimawh a, hei hian zanin inkhel a ti ngaihnawm lehzual ang.
