Vettel nena inel kha a hautak - Hamilton

Lewis Hamilton chuan Formual 1 inelna a hmachhawn ve tawh chinah elpui hautak tak tak a neih ṭhin thu a sawi a, chung zingah chuan German tlangval Sebastian Vettel nena inbeih chu awlsam lo ber nia a hriat thu a sawi.

Red Bull car a khalh laiin Vettel-a'n F1 title vawi li a la thei a, tunlaia Red Bull car khalhtu Max Verstappen nen pawh Lewis hi na takin an inel chhunzawm leh ngei dawn niin a lang.

Mercedes driver Hamilton chuan, "Max hi driver ṭha tak a ni, engtik niah emaw chuan a la champion ngei pawh ka ring. Hlawhtling tur erawh chuan a team lamin engtiangin nge an puih ṭhat tih leh driver dang chet dan a pawimawh dawn.

"Vettel nen khan inelna hautak zet ka lo hmachhawn tawh, ani kha vawi li champion thei a ni. Driver ṭha berte zinga mi nen kan awm rual chunga tun dinhmun ka thleng thei hi thil mak tak chu a ni bawk, ani nen inel kha a hautak hle," a ti.

Britain tlangval hian F1 title vawi sarih a la tawh a, champion hnem ber Micheal Schumacher nen an record a intluk mek. Kuminah hian a champion leh a nih chuan record thar a siam dawn, inelna hmasa berah a chak lehnghal avangin rinkai ber a ni zel.

Hamilton elpui ber ni ṭhin Vettel hian beiseina sang tak nan Ferrari a zawm a, mahse car sen ṭha leh chak zet nei chungin nomawi a chawi thei lo. Italian team tana a contract hmang zoin a chhuak a, tunah chuan champion rinkai zinga mi a ni phak rih lo.

Pathianni zan dar 6:30 hian tun season intlansiak pahnihna atan Emilia Romagna Grand Prix an tlan dawn a, champion lai Hamilton leh Verstappen-te chu inel nasa ber tura ngaih an ni leh ang.