Season tawp atan Real an inbuatsaih
Real Madrid-in Champions League quarterfinal aṭanga Liverpool pet chhuakin semifinal an lut a, La Liga lamah hmahruaitu Atletico Madrid chu point khat chauhin an phak lo bawk - league match riat bak khelh tur a awm tawh lo.
Real hian Pathianni zan dar 12:30-ah Getafe chu league match khel turin an lenchilh dawn a, point thum aia tlemah an lungawi lo ang - Pathianni zan dar 7:45-ah hmahruaitu Atletico Madrid chuan Eibar an mikhual dawn bawk.
Season tawp turin hun tlemte chauh a awm tawh a, hetihrual hian Real tan hmingṭhatna leh hmingchhiat inkar hi a zim hle - hetiang boruak karah Real-in season thar an thlir leh der tawh a, player hralh tur leh lakluh tur thlengin an ruahman fel tawh niin Spanish chanchinbu lar Marca chuan a tarlang.
Lakluh tur
Real hian Bayern Munich defender David Alaba chu lalut turin inremna an neihpui tawh niin Marca chuan an tarlang a, January kar hnihnaah khan Alaba leh Real hi inrem tawh mah se season tawpah chauh an inremna hi puanfel tum a ni thung.
Kum 28 mi Alaba hi nipuiah Bayern-a a contract-a zo tawh dawn a, hei vang hian January khan a club duh zawng chu inremna neihpui turin zalenna a nei - Santiago Bernabeu lamah a kal ngei dawn niin a lang ta.
Real hian Paris Saint-Germain forward Kylian Mbappe leh Borussia Dortmund forward Erling Haaland lakluh an tum bawk a, player pahnih lalut tur erawh chuan sum an sen ve nual a ngai ang.
Chhuak tur
Real-in an rim player-te hi player man to leh hlawh hnem vek an ni a, hei vang hian player langsar leh hlawh hnem engemaw zat chhuahtir an ngai - chhuahtir tur zingah hian Gareth Bale, Marcelo leh Isco hming sawi rik a ni.
Anni pathum bakah hian Alvaro Odriozola, Mariano Diaz leh Luka Jovic chu Real-in club dang zawrh an tum bawk a, an player chhuahtir tumte hi an man a to thei tawh lo tih a lang vek a, chutihrual chuan an hlawha an insenral tur erawh an hum thei ṭeuh ang.
Sergio Ramos leh Lucas Vazquez-te chu tun season tawp ruala an contract hmang zo turte an ni ve bawk a, player pahnih hi Real-in indawrna neihpui reng mah se he thu buatsaih a nih thleng hian inremna an la neihpui thei lo.
Hralh thiang lo
Real-in player lakluh tur leh chhuak tur thlengin an duang a, hralh thiang lo thlengin an awm - player ṭhangduang rual Vinicius Junior (kum 20), Fede Valverde (22), Rodrygo Goes (20) leh Martin Odegaard (22) te chu hralh thiang lo zingah an awm.
Player tarlan zingah hian Odegaard chu Arsenal-ah loan-in a khel mek a, Real-in hralh erawh an tum lo. Player palite hi kum lama la nau tak vek an nih avangin Real chuan team thar din nan kawl reng an tum. Thibaut Courtois, Casemiro, Toni Kroos leh Karim Benzema-te chu Real-in khawih chet thiang lo huanga an dah an ni bawk a, anni pali hian season tharah pawh hmun pawimawh an la chang zel dawn tihna a ni.
A chhehvel
Real-in khawih chet thiang lo zinga Odegaard an dah hi a mak angreng. Norwegian midfielder hian khawvela midfielder ṭha pawl ni turin theihna a nei tih hi chu thil chiang sa a ni a, mahse, coach Zinedine Zidane nen an inkar a ṭha lo.
Madrid club thuneitu lamin Odegaard hi chelh an tum tak tak a nih chuan Zidane nena an inkar chinfel dan tur an ngaihtuah tel a ṭul ang.
Hetihlai hian kum 2022-a a contract hmang zo tur Raphael Varane chuan Real-in contract thar ziak tura an dawrna chu a lo hnar tawh a, Real hian season khat dang kawla a thlawna chhuahtir ai chuan player dang leina tur tuak nana man to taka chhuahtir an hnial lo mai thei.
