Copa del Rey final : Barca tan indinthar lehna hun ṭha
Copa del Rey final chu zanin dar 1:00-ah khelh a ni dawn a, Athletic Bilbao leh Barcelona-ten champion an inchuh dawn.
Barcelona hi El Clasico-a Real Madrid ngam lo hlim an ni a, Real laka an result hian La Liga nomawi chawi an tumna chu dinhmun derthawng takah a siam mek.
Ronald Koeman hnuaia insiam thar tum Barcelona tan zanin match hi 'thih leh dam kar' ang hiala sawi theih a ni a, zaninah nomawi an chawi thei a nih chuan La Liga lamah pawh an phur sawt ang.
Hmanah chuan
Zanina team pahnih intawng tur hian Copa del Rey-ah record an nei ropui dun hle - Barca hian vawi 30 nomawi chawi tawhin champion ngun ber an ni a, anmahni hnaih bertu Athletic Bilbao hian vawi 23 chu nomawi an chawi tawh ve bawk.
Team pahnih sulhnu thlirin a ropui a, zanina an inkhel pawh a hmuhnawm ang - final-a an intawn hnuhnung ber chu 2014-15 season kha a ni a, 3-1 in Athletic Bilbao an tlawm.
Athletic hian April 4 khan season hmasa Copa del Rey final chu Covid-19 vangin an khel ve thei chauh a, Real Sociedad lakah Mikel Oyarzabal-a penalty hmangin an tlawm. Thla khata nomawi pahnih hloh an duh lo ang.
Barcelona hi
Catalan club-in Champions League-ah beisei tur an nei tawh lo a, La Liga nomawi beiseina a nghing a, Copa del Rey hi tun season atan an beisei theih chhun a ni ta.
Ronald Koeman tan a hna humhim turin nomawi chawi a ngai a, Lionel Messi-a'n chamna tlaka a la ngaihna turin Barca tan nomawi chawi nge ngei a ngai bawk - Barca tan he final hi a pawimawh lehzual, tiin sawi ila, sawi uar lutuk kan ni lo ang.
Koeman-a'n player inhliam thar lam a neih loh avangin a duhthalin team a rem thei dawn a, tlarhmaa Messi, Antoine Griezmann leh Ousmane Dembélé inkawp tur mitthla ringawt pawh hi Bilbao tan chuan ṭim uai uaina tham a ni - tlarhnung lam ho turin Gerard Pique-a dam leh tawh bawk.
Bilbao thlirna
Athletic-in tun hnaiah result an nei ṭha hleithei lo a, inelna hrang hranga an match hnuhnung parukah chak an nei lo - La Liga-a an match hnuhnung pangaah chak an nei miah lo. Vawi khat an tlawm a, vawi li an khingpui an inhnehtawkpui.
Chutihrual chuan he team hian an khelh ṭhat nia inkhel thlak danglam thei khawpa thiam Iñaki Williams leh Iker Muniain an kawl a, player pahnih hian an theihna anga an khelchhuah chuan Barca tlarhnungin hna an ngah ang.
Tlarhnung lam ho turin Iñigo Martínez a awm bawk - theihnghilh loh tur chu Bilbao hian Spanish Super Cup semifinal-ah Real Madrid pet chhuakin final-ah Barcelona an hneh zui a, zaninah an hneh 'hnu' Barca an hlau thut dawn lo.