Vawiinah HPC Cup final

Lunglei District Football Association hnuaia inelna lian HPC Cup 2021 chu vawiin hian a hmawr bawkna neih a ni dawn. Vawi li champion tawh Electric Veng leh a vawi khat nana final khel tur Pukpui-te chu chhun dar 1:30-ah an inhmachhawn ang.

Ṭhuamluaia Muala inkhel tur team pahnih hian fans an ngah, mahse hri leng vangin a hmunah entu an awm thei dawn lo. LDF Cable Network leh Pholeng YouTube Channel-ah live-in pekchhuah a ni ang. Electric Veng hian player an nei ṭha - Indian Arrows forward TC Lalruatfela, Churchill Brothers midfielder Lalengzama leh Real Kashmir midfielder Lalrindika Ralte te an kawl, champion pui tham an ni.

Anni bakah hian MPL Best Defender hlui H. Lalhlimpuia, Indian Junior team-a lo tel tawh C. Lalduhawma, East Bengal pum chhuak Lalchhanhima (Tetepuia) leh Henry Lalṭhazuala te an awm bawk avangin Pukpui tan hna a hautak dawn tih a chiang.

Pukpui hi champion tura rinkai ni ṭhin mah se beisei phak loa thamral fo an ni. Tlarhnungah Aizawl FC defender Vanlalzuidika chu an innghahna a ni leh dawn a. Zo United tana khel tawh B. Laldinthara, midfielder ṭha Lalmuanawma Sailo leh SYS Academy zirlai Lalrinpuia te an inkawp fuh leh a nih chuan champion turin theihna an nei sang ve tawk.

Final kalkawngah Pukpui hian match li an khelh aṭangin goal hnih chauh an chhuah, vawiinah pawh an tlarhnung phui hi an innghahna a ni leh dawn. Tlarhma nei ṭha Electric Veng nen an inkhel tur hi tualchhung football ngainatute tan a hmuhnawm ang.