RVL-in Kulikawn an sawp

Ramhlun Venglai chuan tualchhung player an nei ṭha tih an lantir zel. Nimin khan RVL hian an khingpui Kulikawn chu run 131 zetin an sawp a, Mahuma Memorial 1st Division Screening Tournament khelh laiah vawi ruk an chak ta.

Suaka Cricket Ground, Sihhmuia inkhelah RVL lamin vuak hmasak an thlang. Vanlalhruaitluanga'n run 55 a vaw chhuak a, ani bakah hian Vanlalrinzuala (33 runs), Reuben Lalhruaizela (27), Joseph Lalthankhuma (26), Vanmalsawma (22) leh Remruatdika Ralte (21) te an che ṭha vek.

RVL hian over 50 chhunga run 217 tlinin mi pasarih an in hloh a, target sang tawk tak an siam. Match hmasa paruk aṭanga vawi nga chak thei Kulikawn tan umphak theih erawh a ni a, an huphurh lutuk loin a rinawm.

Mahse, RVL ball vawm thiam Remruatdika Ralte an ngam lo. Remruatdika hian over ruk a vawm aṭanga run 22 chauh pein wicket li a la a, a team chakpuiin Player of the Match atan an thlang. Kulikawn lam hian run 86/10 bak an tlin lo.

Ramhlun Venglai hian an league round hmabakah Chanmarians leh Armed Veng an la hmachhawn dawn a, final luh leh luh loh chu an kutah a innghat. An elpui Chhinga Veng chuan team ṭha pahnih - Kulikawn leh Chanmarians an la hmabak ve thung.

Vawiin hian inkhel pakhat a awm dawn, Chanmarians leh table hnuai bera awm Bawngkawn South an inhmachhawn dawn. Chanmarians hi vawi nga chak tawh niin final lut thei zinga mi an ni a, Net Run Rate a pawimawh dawn avangin Bawngkawn hi sawp theih a pawimawh ang.