Juventus thil mak thlentirtu Mr Champions League Ronaldo

Atletico Madrid-in an muala Juventus 2-0 a an hnehna chu thawnthu ziaktuin Cristiano Ronaldo ropui zia pholan theih nana a duan lawk ang mai a ni. Tla tawha ngaih Italian champion Juve hian Thawhlehni zan khan Ronaldo hattrick hmangin Atletico an lehthal a, aggregate-ah 3-2 in an chak.

Kumin Champions League-ah champion lai Real Madrid chu Ajax-in an lehthal a - 'Ronaldo awm loh vang' tiin a sawi theih. Champion châk Juventus-in Atletico Madrid an lehthal a, 'Ronaldo vang' a ni thung. Italian champion-in kum 33 mi mana pound maktaduai 99.2 an sen ngam chhan chu a chiang.

Zawlnei nge inringtawk?
Khawvel manager zinga tlarhnung rem thiam ber zinga mi Diego Simeone enkawl Atletico Madrid lakah Juventus tan thawhchhuah theih loh chu ni lo mah se thawhchhuah harsa bik chu a ni chiang.

Hetiang boruak karah hian Ronaldo chuan a chhungte leh ṭhiante bulah Juventus-in quarterfinal an thlen tur thu leh hattrick a siam tur thu a sawi lawk a, inkhelh hmain he thu hi tihdarh a ni a. Inkhelh zawhah a ropuina belhchhahtu a ni.

Ronaldo, Ronaldo, Ronaldo
Juve coach Massimiliano Allegri chuan ṭan phat aṭangin na taka nawr turin game plan a siam a, full back pahnih Leonardo Spinazzola leh Joao Cancelo te pawhin tlan chhuak tam turin thupek an dawng. Mipui lam pawh an ṭang flag vai tur 30,000 zet an sem chhuak.

Italian champion tan minute lina lekah captain Giorgio Chiellini chuan goal a khung nghal a, amaherawhchu VAR hmanga en let a nih hnuah keeper Jan Oblak lakah Ronaldo a foul avangin pawm sak a ni lo.

Ronaldo-a'n minute 27-naah huaisen taka zuang lutin a tauh lut a, Ronaldo khung dan tur renga mawi a ni. Minute 49-naa Ronaldo tauh chu Jan Oblak-a'n a beng chhuak hman niin lang mah se tunlai thiamna Goalline Technology zarah goal-ah an pawm.

Hun tawp lamah Fiorentina player hlui Federico Bernardeschi chuan ṭha taka a lakluh hnuah penalty a hlawh chhuak a, pressure sangah Ronaldo rawn pen chhuakin 'cool' takin quarterfinal luhna goal a khung.

Mr Champions League
Ronaldo hian Real Madrid tana a khelh laiin Champions League inelna hnuhnung pangaah vawi li a champion pui a, hemi hma hian Manchester United chu a champion pui tawh a. Player pawimawh a ni vek tih pholanna chu inelnaah hian season sarih chhung top scorer a ni tawh.

Portugal captain hian Champions League-ah goal 124 a khung tawh a, amah ang bawka player ropui Lionel Messi aiin goal 18 in a khung tam zawk a, an hattrick siam zat erawh vawi riat ve ve a ni thung. Ronaldo goal khung zat hi Atletico Madrid goal khung zat let thum aiin a tam zawk.

Cristiano Ronaldo chuan, "Zan duhawm bik a ni a, ka goal vang chauh ni loin kan rilru put hmang vang te khan ka lawm. Champions League-a che ṭha tur chuan kan huaisen a ṭul a, Juventus hian min lei chhan pawh a ni ang. An la tih ngai loh tih pui turin min duh a ni," tiin a sawi. Italian champion hi vawi hnih chiah Champions League-ah an la champion a, tun ṭum hi knockout stage china goal hniha an hnufual hnua an comeback hmasa ber a ni.

Atletico lam
Atletico Madrid-in goal hnih an hum theih loh avangin Diego Simeone-a'n dem a hlawh a, tlarhma lama awm Alvaro Morata leh Antoine Griezmann te goal hmaah an fimkhur tawk lo bawk.

Argentine manager Diego Simeone chuan, "Kan khelh chhiat ber ṭum niin ka hre lo a, kan rilru put hmang lam pawh a ni lo. An khel ṭha a, fak an phu," tiin an khingpui a fak.